Serchhip-ah ropui takin Independence Day hman a ni

India ram zalenna champha phak vawi 71-na chu ram chhung hmun dangte rualin nimin khan Serchhip-ah pawh Khawtetlang Field-ah hman niin, PHED, UD&PA etc. Minister Pu Zodintluanga chu khuallian a ni.

Serchhip-a Independence Day lawmna hi chawhma dar 10:30-ah ṭan niin, khuallian chuan hnam puanzar pawt pharhin hnam puanzar chibai buktu Parade Contingent 15 te chibai bûk a chhanglêt a, hemi hnu hian ram chhung hmun hrang hranga Independence Day lawmnaa chhiar chhuah tura tih New India Pledge (thutiam) chu a chhiar chhuak a, hemi hnu hian thu sawiin Pu Zodintluanga chuan ram hruaitu hmasa te leh ramin zalenna a hmuh theih nana nunna hlantute leh tha leh tui sengtu zawng zawngte zahna chibai buk a buk thu a sawi a, zalenna tel lo chuan khawi ram leh hnam tan mah hmasawnna a awm theih loh thu sawiin, India ram pawhin zalenna a hmuh hnu reiloteah khawvela ram ropui berte zinga miah a inhlang kai thuai ani, a ti.

Pu Zodintluanga chuan Serchhip District-in hmasawn-na a neih hrang hrang tarlangin Eklavya School te, Sainik School Chhingchhip te, Thenzawl-ah Girls Hostel leh Integrated AYUSH Hospital thar te, Serchhip Tourist Lodge thar te, Boxing Hall te, District Agriculture Office leh ATMA Building thar te, District Research Office Building thar leh India hmarchhak huap pawha zahpuiawmloh Serchhip Auditorium changkang tak mai tun hnai hawn an nih thute a tarlang a, hengte bakah hian tuna hawn mai theih tur peih thawkhat tawh Fire & Emergency Service Building thar leh Quarters engemawzat sak mek te, District Education Complex te, Serchhip DIET building te a sawi bakah hun reilotea peih mai theih tura hna thawh mek Serchhip Sport Complex te, Nursing School te, Panchayati Resource Centre leh thil dang engemawzat a tarlang a ni.

Heng hmasawnna hna-thawh hrang hrang bakah hian Minister chuan NLUP hmanga sawrkarin Serchhip District chhunga kuthnathawktu a ṭanpui dan sawiin tun thlengin chhungkaw 9524 hnenah NLUP hi pek an ni a, sum cheng nuai 7504.39 sên a ni, a ti a, sawrkar Flagship Programme thar New Economic Development Policy (NEDP) hnuaiah Serchhip District chhunga hna hrang hrang thawh nan kum 2016-17-ah LAD kaltlangin cheng nuai 225 pek a nih thu leh 2017-18 atan cheng nuai 75000 ruahman leh mek a nih thu a sawi a, Housing for All (PMAY) hmangin chhungkaw 3136 te chu BLC hnuaia ṭanpui tura hmalak mek a nih thu leh Credit Link Subsidy Scheme hmangin 2016-17-ah chhung-kaw 60 loan pek a nih thu leh 2017-18-ah chhungkaw 100 hnena pek tura ruahman mek a nih thu a sawi a, PMAY-G kaltlangin 2016-17 chhungin District chhungah mirethei chenna in 48 sak a nih thu a sawi bawk.

Thu a sawi zawhah Minister hian Parade Contingent tiṭha te hnenah lawmman a sem nghal a, pakhatna chu Presbyterian English School niin, Govt. Serchhip High School NCC te chu pahihna an ni a, pathumna chu Lal Thanhawla Higher Secondary School te an ni.

Hemi hnu hian Border Security Force, 199th Battalion ten ralthuam an phochhuah chu khuallianho hian mi pawimawh ten an enho a, chhun dar 12 ah VIP at Home Tea Party, DC Bungalow tualah neih chhunzawm nghal a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram