Swachh Bharat Mission (Gramin) hnuaia Serchhip District chhung thingtlang khua te khawlaia inthiar awm tawh lohna Open Defecation Free (ODF)-a puan an nih tawh hnuah Serchhip khawpui leh District chhunga khawpui lian dang (census town) te chu Preliminary Open Defecation Free khuaah puan an ni ve leh ta a, Central lam aṭanga endiktuten an rawn endik fel hnuah Serchhip District pumpui chu ODF District-ah puan a ni tawh ang.
Nimin khan Serchhip District Sanitation Task Force chu an Chairman Pi Sangchhin Chinzah, Serchhip Bawrhsap ni bawk hovin a Office chamber-ah an ṭhukhawm a, he hunah hian Pi Sangchhin Chinzah chuan Serchhipa hna a thawh tirh aṭangin Open Defecation Free (ODF) chu a hna ngaih pawi-mawh leh thawh hmasak a nih thu sawiin, Mizoram mipuiten faina leh thiang-hlimna kan mamawhna a vei ṭhin thu a sawi a, Serchhip khaw chhungah phei chuan engkim a nih tur ang thlapin, kawng tinrenga finfiah ngam, Sanitised Latrine dik tak vek hman ngei tur a ni, tiin hmalak mek dan leh tuna hna kal lai mek thawh dan a sawi a, faina lama inzirtirna uar turin sawrkar hnathawk, tlawmngai pawl, kohhran leh khawtlang hruaitute a ngen bawk.
Nimin meeting hian Ser-chhip District chhunga Urban Area te Preliminary Declaration a neih bakah hian khaw chhung tihfai hna thawh chhunzawm dan tur te, State task Force aṭanga hmalakna tur ruahman-na lo kal ûmzui dan turte an rel bawk a, Serchhip khaw chhunga bawlhhlawh paih motor zing zawka a tlan kual theih dan tur ruahmanna te pawh member te hian an sawi bakah, faina inzirtirna lama nasa zawka hmalak dan turte an sawi a ni.
Census town te ODF-a puan dan tur ruahmanna (ODF Declaration Protocols)-ah chuan, Census town-a Ward tinten Self Declaration an nei phawt ang a, chumi hnuah District Task Force-in Preliminary Declaration an nei leh ang a, State Task Force hnenah thlen nghal ang a, ni 15 chhung sawisel duh neite tana sawisel theihna hun hawn a ni nghal ang a. State level hian Central lam thuneitute hnenah an thlen ve thung ang a, ni 30 chhungin Central lam atanga endiktuten an duh anga an rawn endik leh vek hnuah tlinga an pawm chuan ODF ah khawpui hi puan theih chauh a ni.
District chhung thingtlang lam (Gramin) erawh chu khaw tinte ODF-ah an inpuang vek tawhin, Block leh District Level Committee pawhin an endik vek tawh a, tunah hian State Level endik hun ngaihchan mek niin, State Level endiktuten tlinga an ngaih chuan final Declaration neih theih a ni thung dawn a ni.