Emirates Cup-ah Arsenal chuan 1-2-in Sevilla hnehlo mahse Emirates Cup an kawl lai chu an la humhim thei.
Arsenal goal awm chhun hi Lyon aṭanga £52m-a an lei Alexandre Lacazette khung a ni a, France international kum 26 mi, Lacazette tan a Club thar Arsenal Home-a goal a thun hmasak ber a ni a, Alex Oxlade-Chamberlain siamsak a ni.
Sevilla tan hian Joacquin Correa leh Steven N’Zonzi ten goal an thun a, Emirates Cup-ah hian Sevilla hi match 2-ah chak ve ve mahse Gunners hian trophy an chawi ta zawk a ni.
An match hmasa berah Sevilla hian 1-0-in RB Leipzig an hneh a, hetihlai hian Arsenal chuan 5-2-in Benfica an hneh a, team tin te hi an goal thunzat aṭanga point pek an nih avangin goal thun tam ber Arsenal hi table-ah a chung berah awmin, Emirates Cup hi an chawi ta a ni.
Lacazette hi goal a thun hnu minute 10-ah a ke hliam vangin lak chhuah a ni.
Arsenal hian Premier league ṭan hma-in August ni 6 khian Community Shield inchuhin Chelsea an hmachhawn dawn a, ni 5 hnuah Leicester City an hmachhawn dawn a ni.