Tu te emaw nawr vak hi ngaihtuah a ngai:CM

MPCC President Pu Lal Thanhawla Chief Minister chuan hnam tana thahnem ngaihna avanga tute emaw nawr vak chuan rampum tana thil ṭha lo zawk a thlen thei em tih ngaihtuah a ngai a ni a ti.

Nimina Lunglei District Congress Committee Office-a Political Session-ah he thu hi a sawi a, MPCC President chuan hnam tana ṭhahnem-ngaihna avanga tute emaw a biling a balang a kan nawr nasat lutuk hian rampum tana thil ṭha lo zawk a thlen phah thei angem tih kan ngaihtuah a ngai a, Mizote chu hnamdang ngai thei lo lutukah midangten min ngai palh ang tih a hlauhawm em tih te pawh kan ngaihtuah a ngai a, hnam rilru put chu hmuiah chauh ni lovin thinlung lamah a ni tur a ni a, Politics-a hamṭhatna lâk duh vang maia hnam rilru put tur a ni lo a ti.

MPCC President chuan nakum inthlanpui lo awm turah tute mahin Chakma Candidate nei lo ta ila, Chakma MLA pahnih te hi tling leh tho si se, a hnu lamah kan inchuh leh luai luai angem tihte pawh ngaihtuah a ngai hle a ni a ti a, MNF President-in an mal din tur thu a sawi chungchangah an chakna thahrui chu BJP an nih dawn miau avangin mal din chungin BJP te hi Seat an ken a ngai lo ang tih a sawi theih loh a ni a ti a, an seat ken tur zingah chuan Chakma Candidate an tel ngei a rin thu Pu Lal Thanhawla chuan a sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram