Kumin fur chhunga Mizoram hmun hrang hranga tuilian leh leiminin thil a tihchhiatte a hmuna enfiah tura sawrkar laipui din, Inter-Ministerial Central Team te chuan an hotu Shri Dilip Kumar, Joint Secretary (Centre-State Division), Ministry of Home Affairs hovin Inrinni khan Tlabung an tlawh.
He Inter-Ministerial Central Team te hi kumin June thlaa Khawthlang Tuipui lianin Tlabung khua leh a chhehvela in leh lo a tihchhiatte a hmuna enfiah tur leh zirchiang tura lo kal an ni a, Central team hi Mizoram sawrkar aṭangin Pu Zosangliana, MPS, Joint Director (OP), Department of Disaster Management & Rehabilitation (DM&R)-in a ṭawiawm a, Tlabung Helipad-ah Central team hi Pi V.Lalmuanpuii, BDO Lungsen Block, Pu Daniel Sailo, ASO Lunglei District, Pi C.Lalremruati, Lunglei District IPRO, Pu K. Beimotaosa, Tlabung SDPO leh official dangte bakah khawtlang hruaitu VC te leh tlawmngai pawl aiawhte leh BSF hotuten lo dawngsawngin Tlabung leh a chhehvela tuilianin thil a tihchhiat leh mihring chênna in engemawzat a len bo tak hnuhma leh chhiatna tuarte dinhmun a hmunah an enpui a, Central team te hian he khuarel chhiatna thleng chungchang an hriat duh hrang hrang official-te zâwtin report kimchang tak sawrkar laipuia thehluh tur an buatsaih mek a ni.
Tuilian vanga chhiatna a hmuna an enfiah hnu hian YMA Hall, Tlabungah inkawm-hona hun tawi hman a ni a, he inkawmhona hunah hian Pu Daniel Sailo, ASO Lunglei District chuan thu sawiin, tuilian vanga harsatna tawkte chhawmdawlna hna chu Mizoram sawrkar, khawtlang hruaitu leh tlawmngai pawlte leh BSF te ṭangrualin theihtawp chhuaha kalpui chhoh mek a nih thu kalkhawmte a hrilh a, he chhiatna rapthlak tak thleng avang hian chhungkaw tam takin an in leh lo, an eizawnna an chân a ni tiin, heng mi te hian ṭanpuina an mamawh takzet a ni, a ti bawk.
He huna thu sawitu dang Pi C.Lalremruati, Lunglei DIPRO chuan chhiat tawhna a hmunah ngei sawrkar laipui official-ten an tlawh thei chu Tlabung mipuite tan malsawm-na a ni tiin, Central team te lo dawngsawng tura sawrkar department hrang hrang te an lo inpuahchah dan tlangpui a sawi a, he hunah hianVillage Council hotute bakah tuilian vanga chhiatna tuarte aṭangin thusawi ngaihthlak bawk a ni
Inter-Ministerial Central team te hi zan 3 riak turin August ni 4 khan Mizoram lo thlengin, hemi ni vek hian Aizawl leh a chhehvel a leimin leh tuilianin thil a tihchhiatte a hmunah an enfiah bakah Mizoram sawrkar official pawimawh te nen meeting neiin an ṭhukhawm a ni.
Inter-Ministerial Central team member lo kal te hi an hotupa, Dilip Kumar, Joint Secretary (CS), Ministry of Home Affairs bakah Dr. Virendra Singh, Director, DRD Patna, BK Mishra, Assistant Director, Ministry of Finance, Pradeep Kumar Lal, Executive Engineer, Guwahati leh Mohit Verma, Assistant Director, Ministry of Rural Development te an ni.