Manchester United chuan striker Zlatan Ibrahimovic chu kum khat daih tur Contract an ziakpui leh.
Kum 35 mi, Sweden striker hian season liamta khan Manchester United tan hian game 46 khelin goal 28 a thun a, a khûp hliam avangin United-a a contract a hman zawh hma-in June thla khan United chuan an release a, tunah hian a khûp hliam hi a enkawl mek a, December thla chuan a fit leh hman beisei a ni.
United manager, Jose Mourinho chuan, “Season liamtaa kan tana a contribution avang khan amaha rinna kan nghah hi a phu a, a lo kir leh hun tur pawh dawhthei takin kan nghak dawn a ni,” tiin a sawi.
Ibrahimovic hian nikum July thla khan free transfer-in Red Devils hi a zawm a, United-in an release hnua a khup zai a nih hnuah pawh United training ground-ah hun a hmang chhunzawm zel a ni.
Mourinho chuan sawi chhunzawmin, “Zlatan-a’n dam lam a pan chho zel hi kan lawm a, season chawhnu lamah a pawimawh dawn avangin contract ziakpui chungchangah hian harsatna ka nei lo,” tiin a sawi bawk.