US Open khelh mekah Mipa leh hmeichhe top seed Rafael Nadal leh Karolina Pliskova-ten first round an paltlang a, hetihlai hian hmeichhe defending champion Angelique Kerber erawhin First Round a paltlang zo lo thung.
World No. 1 Rafael Nadal chuan Dusan Lajovic chu 7-6 (8-6), 6-2, 6-2-a hnehin Second Round a lut a, Second Round-ah hian Japan’s Taro Daniel emaw American Tommy Paul emaw a hmachhawn dawn a ni.
US Open-a vawi 5 champion tawh Roger Federer chuan First round a paltlang a, mahse First round paltlang nan hian set 5 a mamawh a ni.
Third Seed kum 36 mi, Federer hian Frances Tiafoe chu 4-6, 6-2, 6-1, 1-6, 6-4-in a hneh a, vawiin hian second round-ah Slovenia’s Blaz Kavcic emaw Mikhail Youzhny emaw a hmachhawn dawn a ni.
Hmeichhe lamah champion lai Angelique Kerber chuan First Round a paltlang zo lova, Japanese tleirawl kum 19 mi, Naomi Osaka lakah 6-3, 6-1-in a chak lova, kum 29 mi, Kerber hian thla 12 liam taa New York-a title a lak hnu khan title dang a la leh ta miah lo a ni.
Hmeichhe Top seed Karolina Pliskova chuan a vawi khatna atana Grand Slam title lak ngei tumin US Open-ah bul a ṭan ṭha hle a, Poland’s Magda Linette lakah darkar khat leh minute 18 chhung lekin 6-2, 6-1-in hnehna a chang a, French Open Champion Jelena Ostapenko chuan Lara Arruabarrena chu 6-2, 1-6, 6-1-a hnehin Round one a paltlang a, Yanuna Wickmayer chuan 28th seed Lesia Tsurenko chu 6-3, 6-1-in an hneh a, Czech 23rd seed Barbora Strycova pawhin Japan’s Misaki Doi chu 6-1, 6-3-in a hneh a, Romania’s Sorana Cirstea chuan 6-1, 6-3 bawkin Dutchwoman Lesley Kerkhove a hneh bawk a ni.