Union Minister hlui M.Venkaiah Naidu chu nimin khan India Vice President 13-na tura lakluh a ni.
Nimina Vice President lakluhna inkhawm hi Raj Bhawan a neih niin, President Ram Nath Kovind an intiam kamna thu a chhamtir a ni.
Vice President thar, M Venkaiah Naidu hian nimina lakluh a nih hma hian, Raj Bhawan a panna lamah, hnampa Mahatma Gandhi leh Sardar Vallabhbhai patel-te thlan Raj Ghat, Deen Dayal Upa-dhy-ay, DDU park leh Patel chowk ah zahna chibai a buk hmasa a, hemi hnua, lakluh a nih hnuah Rajya Sabha a chairman a nihna hna a chelh nghal a, a vawi khat nan Parliament house ṭhut-khawmnaah chairman a ni.
M.Venkaiah Naidu hian tun thla ni 5 khan opposition Gopal Krishna Gandhi chu hnehin Vice President hna hi a chelh a, M Venkaiah Naidu hi july ni 1, 1949 khan Andhra Pradesh, Chavata-palem-a Nellore district a piang niin, Bachelor’s degree in LAW chu Andhra University, Visakhapatnam ah a pass chhuak a, international law bika thiamna nei a ni.
Vice President-a a tan hma hian Naidu hian politic ah sulhnu alo nei nual tawh a, kum 2002 atanga 2004 khan BJP president niin, Atal Bihari Vajpayee sawrkar hunlai khan Union Cabinet Minister for Rural Development a lo ni tawh bawk a, tun tum sawrkarah hian Minister of Housing and Urban Affairs, Parliamentary Affairs leh Information and Broadcasting minister hna a chelh mek a ni.