Lok Sabha-in Citizenship (Amendment) Bill, 2016 zir chiang tura a ruat Joint Parliamentary Committee (JPC) Chairman hnenah ZNP-in he Bill hnukkir tura ngenna an thlen.
Nimin khan ZNP President Pu Lalduhoma’n JPC Chairman Satyapal Singh, MP hnenah ngenna hi thawnin, nikum July ni 19-a Lok Sabha-a putluh, Citizenship (Amendment) Bill, 2016 zir chiang tura ruat JPC-in mipui ngaihdan lakkhawm hun chhung rei lote chauh a hawng chu an party-in tha lo an tih thu te, sakhua leh chenna hmun avanga he Bill-in a khawih nasat ber turte zinga mi India Hmarchhaka chengte chu an ngaihdan sawina hun, hun tam zawk pek ngei tul an tih thu te a thlen a.
Citizenship (Amendment) Bill, 2016 hian ram Danpuia dan lo awm tawh sa, Citizenship Act, 1955 te, Right To Equality te, sakhua avanga inthliar hran khapna te leh India chu sakhaw tihbik nei lo ram a nihna te a kalh niin ZNP President chuan a sawi a.
Mizoram bika dan phal loha ram dang mi rawn lut ru Buddhist-te pun chak dan tarlangin ZNP chuan kum 1901-ah Mizoramah Buddhist 198 an awm a, kum 10 dana Chhiarpui neih thinah zaa 100 aia tama pung ziahin, hnam leh sakhua behchhana Census hnuhnung ber 1991-ah chuan a hma kum 10 aiin zaa 200-a pungin 80,000 an awm a, 2001 chhiarpuiah khan hnam leh sakhua behchhana inchhiar a nih loh avangin a zat dik tak hriat loh mah se Buddhist-te hi Mizoramah 1,50,000 vel an awm anga chhut a ni, a ti a.
Hetianga nasa taka an pung hi mihring inthlahpun dan pangngai a nih loh zia a lan chian thu te, Election Commission of India-in Electoral Roll-a chuang thei tur, India mi nia a ngaihte chu January 1950-a Indiaa lo awm tawhte an nih avangin heng mite leh an thlah kal zelte chu chhui chhuaha chhinchhiah har pawh an nih loh thu ZNP President chuan a sawi a. Tunah hian India khual leh tui dik tak Buddhist-te chu dan loa a ruka Bangladesh atanga rawn lutte’n an chimral mek a,
Hetiang hi thil awmdan a nih mek laiin Citizenship (Amendment) Bill, 2016 chu dan loa rawn lutrute khua leh tui dik anga chhiar theihna tur hmanrua a nih theih dawn avangin Bill chu hnuklet emaw Bill-in a huam zinga Mizoram telh ve lo turin emaw JPC Chairman chu a ngen a ni.