ZNP, MPC leh MNF party-te’n nakum Assembly inthla-npuiah Chakma Candidate an neih dawn loh thu an sawi.
ZNP chuan nimin khan NGO-Co-ordination Committee Chairman hnenah lehkha thawnin, NGO-Co-ordination Committee-in Chakma Candidate nei lo tura an ngenna chu an Party PAC-in a ngaihtuah hnuah nakum Assembly inthlan lo awm turah khawi bialah mah Chakma Candidate dah lo turin thuthlukna an siam tih an hriattir a ni.
MPC party pawhin NGO Co-ordination ngenna hi nimin khan an pawl Sr.Vice President Pu Vanlalhlana hovin an ngaih-tuah a, NGO Co-ordination Com-mittee-in Mizoram dinhmun thlira kum 2018 MLA General Election lo awm turah Mizoram Political party tinte Chakma Candidate nei lo tura a ngen angin MPC party OB meeting chuan kum 2018 MLA General Election lo awm turah Chakma Candidate neih loh nise, an ti.
Brig.T.Sailoa kaihhruai PC party a din tirh aṭang leh rorelna a chelh chhung pawhin Chakma MLA candidate neih chu sawi loh Unit leh block tak ngial pawh Chakma te chennaah hian din a ni ngai lova, hei hi Chakma-te huatna leh hnualsuat duh vang hrim hrim ni loin, Chakma Foreigner-te laka ram leh hnam humhim tumna vang a ni, an ti.
MNF Party President pawhin nimin khan an party-in Chakma Candidate an neih loh tur thu hi sawiin, hei hi BJP nen thawhdun an tum vang a ni lo, a ti.