Ar eisak ṭhintu Kelral man

Aizawl District hmarlam Kepran khaw mite ran vulh, Ar eisak thintu Keite chi khat Kelral an tih chu Inrinni zan khan thang hmangin khawtlangin an man.

Kepran VCP Pu Lalnghilhlova sawi danin Kelral an man tak hian nikum lam aṭang khan an khaw chhunga an Ar vulh te chu zan lamah a seh sak ṭhin a, zan khata ar 8 lai a sehsak ṭum pawh a awm a ni.

Kelral hian a tirah chuan khaw hmawr deuh leh in hnuai biru deuha an Ar vulh te a khawihsaka amaherawh chu tun hnai hian khaw chhung laili deuh ah pawh zanrei hnuah a che nasa hle a ni ati a, kah hlum mai duh pawh an awm thu sawiin amaherawhchu ransa vâng a nih tawh avang leh dânin a phalloh avangin tihhlum an tum lo tih a sawi a, an khua a Ar a khawihsak ṭhin te leh VC lamten a man dan ngaihtuahin ‘Zawngkhar thang’ kamin Ar an tawktarha Inrinni zan khan an chah ta a, nimin zing lam dar 3 vel khan Kelral hi an awk ta a ni.

Kelral an man thu hi Forest department lamte pawh an hrilh hre tawh niin VCP chua a sawi a, tunah hian Wildlife lama an hotute nen engtia kalpui tur nge tiin an inbe rawn mek tih a sawi a, thudawnna pakhat chuan Kelral hi Dampa sanctuary-ah chhuah tura lâk a nih a rinthu sawiin, ar a sehsak te hnenah hian zangnadawmna pek dan tur pawh ngaihtuah a ni tih a sawi a, tunah hian Kepran ramah hian Kelral la naupang deuh pawh a la awm niin hriat a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram