Zothlifim Logo
Loading ...

Chief Minister Pu Lal Thanhawla chuan Citizenship (Amendment Bill) 2016 hi Mizo hnam leh sakhua tan chuan hlauhawm tak a ni a ti.

Nimina Congress Bhavan-a political session neih-a rorellai Congress party mite hma-ah thusawiin MPCC President chuan Kristian leh Muslim hi BJP te chuan India ram sakhua ni lo, ramdang sakhua-ah an ngai a, chuvangin hlauh tur dik tak chu BJP te hi an ni, a ti. Rampumah pawisa tih thih hnuah ram pum sum thawh chhuah a tlakniam laiin Mizoram chu a sang zawngin a kal hi a lawmawm hle a ni a ti. Pawl pakhatin tunhnaia Parliamentary Secretary bang ta te enkawl nan a Mizoram sawrkarin a senral chu Chief Minister-in rul rawh se an tih chu, a rulhna chhan tur a awm loh thu leh a rulh dawn bawk loh thu a sawi a. Parliamentary Secretary-te chu Assembly-ah dan pass a, dan ang thlap a ruat an ni, a ti bawk.

Chief Minister chuan eptu party MNF ten kawng chhiat vang a total bandh siam an tum chungchang chu sawiin bandh hi kawng ṭhatna tur nise nitin bandh an siam tur thu a sawi a, an hunlaia kawng chhiatzia kha an hre lo em ni? a ti bawk. Engemaw inchawhphurna tur an mamawh ve avangin an kut a thisen kai lo zawnga an chet chuan a tawkah ngai mai ang, tiin a sawi. MNF hotupa ber chu BJP hotute’n New Delhi-ah an ko thla a, MNF hian an mal din tur thu sawi mahse NEDA-ah BJP a thawhpui tlat avangin inthlan hunah pawh a lo berah BJP te nen hian seat an insiamrem a rin thu a sawi bawk.

Pu Hawla chuan Mizoram University in kum khat deuh thaw Vice Chancellor an nei tawh lo hi thil awm ngai lo tak a ni a ti a. Amah ngei pawhin vawi engemaw zat Prime Minister leh Union HRD Minister Smriti Irani nih laite pawhin ziakin lehkha a thawn tawh a. Hetiang a inngaihthah hi a pawi em em a, rawn dah thuai se tih hi an ngenna leh duh dan a ni,a ti bawk.