Zothlifim Logo
Loading ...

Nakuma FIFA World Cup khelh turah a thlengtu tur Russia zawmin Belgium chu World Cup khel turin an tling ta a, Belgium hi Europe aṭanga World Cup khel tura tling hmasa ber an ni ta a ni.

Nizan hmasa khan Belgium hian Jan Vertonghen leh Romelu Lukaku goal thun hmangin Greece chu 2-1-in an hneh a, heng goal pathum te hi second half-ah minute 5 chhunga lut vek niin, minute 70-naah Vertinghen chuan goal hmahruai a thun a, minute 73-naah Gree siphurh hi Zeca chuan sûtin, minute khat hnu lekah Lukaku chuan an chakna goal hi a thun a ni.

Heti hian game hnih khelh tur la awmah Belgium hian Group H-ah point 22 neiin, an hnuai chiaha awm Bosnia-Herzegovina aiin point 8-a an sân tawh avangin World Cup khel turin an tling chiang tawh a, Belgium hmaah hian a thlengtu Russia bakah Brazil, Mexico, Iran leh Japan te chu Word Cup khel turin an lo thling tawh a ni.

Hetihlai hian Switzerland chuan Pathianni-a hnehna an chan avangin European Champions Portugal aia point 3-a an sânna chu an la chhawm nung zel a, Switzerland hi an chak zel a nih chuan Portugal hian play-off aṭanga World Cup khelh an tum a ngai dawn a ni.

Hetihlai hian Netherlands dinhmun pawh a ṭha lo hle a, Bulgaria an hneh avangin World Cup khelh an beiseina an la chhawm nung hram hram a, tunah hian Group-A-ah pathumnaah an awm a, an chungah hian France chuan point 17 neiin hma an hruai a, Sweden-in point 16 neiin an dawt a, Netherlands hian point 13 neiin pathumnaah an awm mek a ni. Tarlan tawh angin Group tin Winner-te hian direct-in World Cup an khel thei dawn a, Runner-up sâng pariat ten play-off aṭangin hmunruak 4 awm an inchuh leh dawn a ni.