Garage nei leh nei lo thliar hran theih nan Stricker bel nise ti

Home Minister Pu R. Lalzirliana kaihhruaiin nimin khan Co-ordination Committee on Traffic Management an ṭhukhawm a, kumin December ni 1 aṭangin Aizawl Municipal Areaa lirthei nei zawng zawng chu garage nei vek tura beisei an nih angin Local Council tin ten anmahni area ṭheuhvah lirthei awmzat leh garage nei leh neilo uluk taka chhinchhiah chu hmalakna hmasa ni se tiin meeting chuan a rel a, Traffic Police-ten awlsam zawka lirthei garage nei leh neilo an thliar hran theih nan a bik a siam sticker bel ni se tia rel a ni bawk.

Aizawl khawpui chhunga nitin lirthei tlan zat titlem tura hmalakna pakhat atan October thla atangin a enchhin nan mimal leh sawrkar lirthei zawng zawng chu a chhawka tlan ni se tiin Committee hian a rel a. Lirthei number a digit tawp ber chu thla khat a ni indawt a an number thlen apiangin an tlanlo ang. Lirthei lian chi 407 leh a chunglam chu an dinna tur khawpui dai remchangah siam tura rel a ni bawk.

Meeting chuan sawrkar hnathawk lirthei kawl thei chinte pawhin mimal lirthei neite ang bawkin garage an nei tur a ni a ti a, an nei theilo a nih chuan office-ah emaw hmun dangah hunna tur an zawn a tul tih a rel a ni.

Co-ordination Committee on Traffic Management chuan heng hmalakna te hi enzui turin committee a ruat a, Addl. Secretary Home, SP Traffic, AMC Councillor, Transport Director leh I&PR Director-te member atan ruat an ni.

Nimin meeting-ah hian Chairman Minister Pu R. Lalzirliana leh Finance, Planning Minister Pu Lalsawta, Chief Secretary Pu Lalmalsawma leh member dang an tel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram