Zothlifim Logo
Loading ...

Mamit Maxicab Driver-te’n Mamit leh Aizawl inkar kawngpui, NH 44A chu khualzin te tan a him tawk lo nia sawiin nimin aṭang khan an tlan lo ṭan.

Thulakna tarlan dan chuan Mamit aṭanga Dapchhuah thlen hma kawngpui chu a chhiat em avangin Sumo-te chu JCB-in chhuk leh chho zawngin a hnuhkal a ngai thin a, hei hi mipui tan a himlo nia hriain Maxicab Driver-te hian nimin atang khan tiamchin awm lovin, kawng enkawltuten an siamṭhat hma chu tlan rih loh nise an ti a ni.

Kawngpui ṭhat lai chuan Aizawl leh Mamit inkar hi darkar 3 aṭanga darkar 4 vel tlan a ni ṭhin a, tunah chuan darkar 10 aṭanga darkar 15 inkar vel Sumo te hi an tlan ṭhin a, NH 44A kawngpui hi laih zauh hna thawh mek a ni a; kawngpui awmsate chei that mumal a awm loh avangin kawngpuite hi a chhiain motor tan kal hleihtheih a ni rih lo niin kan Corr. thudawnna chuan a sawi a ni.

Mamit District chhung Hachhek Constituency Maxi Cab Welfare pawhin kawng chhiat vang hian niminpiah aṭang khan an Maxicab-te an lo tlantir tawh lo bawk a.

Hemi chungchanga an thuchhuah siamah Hachhek Constituency Maxicab Welfare chuan, kawng chhe lutuka motor tlantir chu khualzinte tan a him tawk tawh loa an hriat vang a ni tih an sawi a. Chawlhkar khat hnuah tlanna tlaka kawng siam that a nih chuan an Maxicab-te tlantir leh theih an inbeisei tih an sawi bawk.