Zothlifim Logo
Loading ...

Nizan hmasa dar 11:30 vel khan Bawngkawn leh Durtlang inkar Haflong khawng chhak aṭanga lung tla chuan a thlanga in Assam type chhungkaw 3 luah lai chu a hnawl chhe vek.

Helai kawngchhak aṭanga lungtawlh thla hi a tlâkna khâm a sâng hle a, hei hian a thlang in Assam type chhawng hnih Pu Vanlalsiama in, chhungkaw thum luah lai chu a hnawl chhe vek a, heng bakah hian a bul hnaia concrete insak lai mek pawh a bang ṭhenkhat leh a ban te lung lian tla hian delh chhiain motor pakhat pawh a bang tlem azawng a delh chhe bawk a ni. In a hnawl chhiat tak luahtute hi an in saseng hman avangin thi leh hliam an awm lova, bungrua erawh engmah an chuh hman lo nia thu dawn a ni. He leiminna laiah hian nizan hmasa thimhlim khan lung lo tlain a hnuaia vai pakhat insil lai chu a deng fuh a, a hliam deuh avangin Synod Hospital lamah hruai nia thudawn a ni.

Kham ko aṭanga Lung tla hi a len tham avang leh a tam avangin helai kawng hi lirthei engchi mah a kaltlang theilo a, nimin zing khan Aizawl DC Dr. A. Muthamma chuan a hmunah thil awmdan enfiahin kawngpui hnawhtu lunglian te la sawn turin PWD te nen JCB hmangin hna thawk nghal turin ruahmann an siam nghal a ni a, vawiin nileng khan kawng thenfai hna hi thawh a ni chungin, lung te hi a len hlawm deuh avangin nimin tlai lamah pawh kawng a la tlang thei rih lo a ni.