Zothlifim Logo
Loading ...

MNF party National Core Committee Member, Law Minister hlui ni bawk Pu H.Rammawi chuan, niminpiaha Mizoram sawrkara Parliamentary Secretary 7 ten Chief Minister Lal Thanhawla hnena an thehluh chu Law Court order an hlauh vanga bâng niin a sawi a, High Court lama an hmalakna chu an chhunzawm zel dawn tih a sawi bawk.

Pu H.Rammawi hian nimin chhun khan Aizawl Press Club-ah thuthar lakhawmtute kawmin, Mizoram Congress sawrkarin kum 2009-a The Mizoram Parliamentaries (Appoinment, Salaries, Allowances and Miscellanous Provision) Act, 2009 a siam kha India Constitution Article 164(1A) kalh a ni e tia Gauhati High Court-a an khin thu a sawi a. Parliamentary Secretaries hmingin Ministers an ruat belh nia an ngaih thu an sawi a, Gauahti High Court chuan hetiang dan hi Assam leh Nagaland-in an siam chu Supreme Court-ah khin niin, ngaihtuah mek an nih avangin Supreme Court thutlukna nghah nise, thutltukna a awm hnuah ngaihtuah turin a lehlam lehlamin an dil (mention) thei tiin November ni 5, 2009-ah order siam a nih thu a sawi a, ‘Supreme COurt thutlukna chu kan nghak ta a ni,’ a ti.

India Parliament-in Constitution siamṭhain State tinten Minister an neih theihzat bithliah a siam a, State ṭhen-khatah chuan Minister an indah ṭeuh ṭeuh thu leh Minister te enkawl nan sawrkarin sum a sen ṭeuh ṭeuh ṭhin thu te, sum renchemna ngaihtuah-na avanga Minister zât bithliah chu Parliament-in Constitution a siamṭhat chhan pakhat nia a hriat thu Pu H.Rammawi chuan a sawi a, Mizoram pawh sum harsatna nasa tak tawh a nih mek laiin, Parliamentary Secretaries te chu Minister of State ang thlapa enkawl nan kum 2009 aṭanga tun thlengin Rs.30,00,00,000/- chuang ngawt mai Mizoram sawrkarin a seng tawh niin a lang a ni, a ti.

July ni 26, 2017 khan Supreme Court chuan Assam Parliamentaries Act, 2004 chu ram danpui (Constitution kalh (Unconstitutional) tiin thutlukna a siam ta tih Pu H.Rammawi chuan a sawi a, hei hi Mizoram Parliamentaries Act, 2009 nen kalphung inang a nih avangin ram danpui kalh a ni tih a chiang nghal a, kum 2009-a Gauhati High Court-in order a lo siam tawh angin, tunah hian Gauhati High Court-ah The Mizoram Parliamentaries Act, 2009 chu hnâwl (Quash) tur leh Parliamentary Secretary te bân vek turin hma an la tih a sawi.

Pu H.Rammawi sawi danin a Ukil, Senior Advocate, Pu C.Lalramzauva chuan Gauhati High Court-ah August ni 18, 2017 khan hma la ṭan lehin, Aizawl High Court Bench-a Division Bench an ṭhut reng loh avangin Gauhati High Court, Principal seat-a an thu ngaihtuah tura a dilna chu Gauhati High Court-in a phalsak tawh thu a sawi a, tunah hian an Ukil, Pu TJ Lalnuntluanga’n Gauhati-ah a châm chilh mek niin a sawi bawk.

Niminpiaha Mizoram sawrkara Parliamentary Secretary te bânna chhan chu Court Order avanga bâng nih ai chuan tiin an bâng ta dial niin MNF party chuan an ngai tih a sawi a, “Parliamentary Secretary-te hi bâng vek mahse, a Act (DAN) kha Quash turin High Court-a kan hmalakna kan chhunzawm zel dawn a ni,” a ti bawk.