Mahni intihhlum venna Ni hmang

Mahni intihhlum Venna Ni World Suicide Prevention Day chu nimin khan Mizoram hmun hrang hrangah hman a ni a, Aizawlah chuan Department of Psychiatry leh National Mental Health Programme (NMHP), Health Department buatsaihin Chanmari YMA Hall- Health Minister Pu Lal Thanzara hovin hman a ni.

Pu Lal Thanzara chuan dam thlahlel tawh lo hial khawpa mi beidawngten beiseina thar an neih leh theih nan mi tinin tih theih an nei tih hriain World Suicide Prevention Day-ah rilru thar put a ṭul a ti a, mahni nunna lak tum, dam chhuak lehten an nuna harsatna vawrtawp an tawh laia an chanchin ngaihthlaksak leh hriatpuitu an thlakhlelh thu leh an thil tum rûk rapthlak tak lak ata chhanchhuaka, kawng dang kawhhmuh theitu an nghahhlelzia an sawi aṭangten thiamna hranpa nei velote pawhin an tan tih theih an nei tih a lang chiang a ni, a ti. Heng mite hian ngaihsaktu leh ngaihventu an mamawh a, an harsatna tawhte sutkiansak theilo mahse, an tana minute khat chauh tal sen chuan mihring nunna hial a chhanhim thei a ni, a ti bawk.

Kum 2003 aṭang khan September ni 10 hi International Association for Suicide Prevention leh World Health Organisation te hmalaknain khawvel pumah mahni intih-hlum tumte chhanhimna kawnga hma sawn theihna tura inzirtir-na hun atan hman a ni a, kumin hi a ṭum 15-na niin “Take a minute, change a life” tih chu kumin thupui atana thlanchhuah a ni. September ni 10 hi Pathianni a nih avangin nimin khan he ni puala hun hman a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram