Chief Miniser Pu Lal Thanhawla’n a Council of Minister tilianin nimin khan Minister of State atan Pu KS Thanga lakluh a ni.
Aizawl South III bialtu MLA Pu KS Thanga hi nimin chawhnu khan Raj Bhavan Multipurpose Hall-ah Governor Lt. Gen. Nirbhay Sharma chuan rinawmna thu thiamtirin a la lut a, lakluh inkhawm hi Chief Secretary Pu Lalmalsawma’n a kaihruai a ni.
Minister atana lakluh a nih hnuah Pu KS Thanga hian Congress Bhavan-a amah lawmpuitute hmaah, ram leh hnam rawngbawlna hna pawimawh tak Minister-a hlankai a ni chu lawmawm a tih tak zet thu a sawi a, Pathian leh Chief Minister hnenah lawmthu a sawi bawk a ni.
Pu KS Thanga nimin tlai dar 3-a Minister of State atana lakluh a nih hnuah Congress Bhavanah MPCC hruaitute ṭhahnem takin lo nghakin, Pathian hnenah lawmthu sawi ṭawngṭaina hun hman a ni a, Pu KS Thanga chuan thutawi sawiin ‘He ram leh hnam rawngbawlna hna pawimawh tak Minister a hlankai ka ni hi lawmawm ka ti tak zet a, Pathian hnenah leh kan Chief Minister zahawm tak Pu Lal Thanhawla hnenah lawmthu ka sawi a ni’ a ti a ni.
Pu KS Thanga hi rorellai Congress sawrkarah Parliamentary Secretary a ni ṭhin a, tunhnai khan Parliamentary Secretary dang parukte nen an nihna aṭangin an bang a, nimina Minister of State atana lakluh a nih hnu hian rorel lai Congress sawrkarah Cabinet Minister 9 leh Minister of State 2 an awm ta a, minister 12 nei thei an ni a, Congress party hmeichhe MLA neihchhun Pi Vanlalawmpuii Chawngthu chu nimin khan Minister atana lakluh ve tur a ni a, amah-erawhchu Delhi-a a zin lai a nih avangin lakluh a ni ve ta lo ni a sawi a ni a, hetihlai hian, Party thuneitute chuan hemi chungchang hi sawichiah a la ni lova, a lo haw huna tihchian tur a ni ang, an ti thung a ni.
Tarlan tawh angin, Minister a nihna aṭanga tunhnaia bang, Pu Lalrinmawia Ralte MLA chu Governor-in niminpiah khan Political Adviser to Chief Minister-ah a ruat a, Pu Lalrinmawia Ralte hian MLA a nihnaa a hlawh lak pangngai bak hlawh a lak belh lo ang a, a hnathawh dan tur leh mawhphurhna turte chu Chief Minister-in ṭul a tih angin siamsak ṭhin ang a, Pu Lalrinmawia Ralte hian hlawh lak belh lo mahse Political Adviser to Chief Minister hna hi Minister of State tlukpui a nih avangin Minister of State-in hamṭhatna an dawn theih ang ang te chu a dawng ve thei ang.