Mipuite beidawnga siamtu MNF leh Congress party:Lalduhoma

ZNP President Lalduhoma chuan “Zoram mipuite beidawnga siamtu chu MNF leh Congress party an ni” a ti.

He thu hi nimina ZNP Office chhung inkhawmah sawiin ZNP President chuan, “Tunlai-ah mi kan beidawng hle mai, anni pawh hi sorkar se engmah an ang chuang lo ang, tupawh hi sorkar se engmah an ang bik chuang lovang tih tawngkam hi tawngkam tualleng a ni. Chuti khawpa zoram mipuite beidawnga lo siamtu chu kum 33 chhunga kan chunga ro lo reltu Congress leh MNF Party te an ni. Sorkar tha pawh beisei ngam tawh lo, midang pawh lo ni leh se la engmah ni lo tur hial khawpa min ngaih tir khawpa min tibeidawngtute chu Zoram hian a hnawl ngam a ngai tawh a ni” a ti.

Kum 2018 MLA inthlan-pui lo awm tur chungchangah Pu Lalduhoma chuan, “MNF emaw Congress emaw a ni leh mai dawn a, a ngai bawk a ni leh dawn tih tawngkam hi a lar em em a. Vawiin ah hian MNF nilo, Congress nilo 2018 a sorkarna siam thei tur Zoram Peoples Movement (ZPM) a ding a ni” a ti a. “Midang an sawm si lova tih tihte hi Congress game leh MNF game a ni. Midang kan sawm reng a, mipui kan tibeidawng ve dawn lo. Mipui la bum ve lo kan awm a, hma kan la mek a, kan la chho zel dawn bawk. A thlakna tur a dang an awm lo tih pawh ni si lova ui ang maia mahni luak hnu ei leh tur hi kan ni tawh lo” a ti bawk.

Myanmar-a Rohingya hnam chungchangah Pu Lalduhoma chuan raltlante Mizoram-a an lo luh lohna tura invên lawk a ngaihthu sawiin , “Rohingya hi Arakan state (Burma)-ah khian maktaduai 1 leh a chanve vel a tam an awm a, Burma sorkar nen an inkarah harsatna a awm avangin tunlai hian an chhuak nasa em em a, Bangladesh sawrkar pawh nasa takin a inpuahchah mek a. Manipur lamah luh phei leh an tum dawn nia a lan avangin Manipur Chief Minister in ramri lamah nasa takin hma a la a, an state chhungah heng Rohingya ho hi an luh an awih lo a, Bangladesha an luh theih loh a, Manipura an luh theih bawk siloh chuan keini vengtu awm velo, sawrkar inthlahdah-in a enkawl mek Zoramah hian an lo lut ang tih hi a hlauhawm em em a ni,” a ti a, “Nakinah thil a lo thlen hunah an lo luh hunah kan buaipui leh anga a pawi mange kan ti leh si ang tih hi kan hlau a ni” a ti a, a tlai hma hian Rohingya ho kan ramah hian an rawn lut ve palh ang tih hlauin kan sorkar hian hma la rawhse. Luh theih miah lohna turin Manipur Chief Minister in a tih theih chuan Mizoram Chief Minister in ti ve rawh se, a ti bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram