Mizoram sawrkar-in Lalhmingthanga Sanate kaihhruai HPC (D) nena August thla chawhnu lama inbe tura ruahmanna chu a tlawlh ta a, Lalhmingthanga hote hian inbiakna atana thu delhkilh an neih chu sawrkarin a pawm saklo nia thudawn a ni.
Home department hotute sawi danin H.Zosangbera kaihhruai HPC (D) nena inbiakna kal mekah Lalhming-thanga pawlte hi biak tel ve a, inremna kawng zawnpui ve nise tia thutlukna siam a ni a, Aizawl-a inbe tura ruahmanna pawh siamin, a ni tak tur an la bithliah lova, Lalhmingthanga kaihhruai HPC (D) te hian inbiakna neih hma hian Autonomous District Council hrang an ngiat bakah inbiakna-ah hian sawrkar laipui aiawh tel ve-in kil thuma inbiak an duh thu sawrkar hnenah an thlen a, Mizoram sawrkar chuan Autonomous District Council hrang siam tum a nih loh thu leh inbiak an duh chuan engmah thu delhkilh mah awm lo ni se tiin an hriattir a, an thu delhkilhte an hnuhdawh duh tak loh avangin Lalhming-thanga pawl nena inbe tura ruahmanna chu ṭhulh a ni ta a ni.
Hetihlai hian H. Zosangbera kaihhruai HPC (D) nena inbiak lehna hun tur chu tunhnai-ah bithliah fel a nih tur thu Home department hotute chuan an sawi a, thui tak inbiakna a kal tawh avangin tun ṭum hi Official level-a inbiakna hnuhnung ber a nih tawh an rin thu an sawi a, a dawt leh aṭang chuan inbiakna hi Political level-ah hlankai a nih rin a ni a, a hmawr an bâwk thuai a, inremna thuthlung ziah thuai a nih an besei thu an sawi a, inbiakna lo awm tawhah te boruak ṭha tak hnuaiah inrin tawnna nen an inbe ṭhin niin an sawi.
HPC (D) hi kum 1994 July thlaa Mizoram sawrkar leh HPC te’n inremna an ziah hnu lawkah inremna thuthlunga lungawi lovin Lalhmingthanga Sanate hian a din a, hun engemawchen a kaihhruai hnu-ah Kuki hel pawlte nen inkawpa sawrkar nen inkahhai an lo puan avangin an pawl hi a phel a, a phel te lam an ni.
Heta an inhriatthiam lohna chhan hi an President Lal-hmingthanga’n thutlukna a siam dawna an hruaitu dangte a râwn loh leh hriattir ve loh vang nia hriat a ni a, H.Zosangbera kaihhruaite hi Manipur-ah an awm a, Lalhmingthanga pawlte erawh chu Mizoram ramri hnaih Assam chhungah an chetla thung nia thudawn a ni.