Zothlifim Logo
Loading ...

ZNP-in Total Bandh siam turin MNF inhmeh lo an ti

MNF party-in naktuk, Ningani-a Mizoram pum huap Total Bandh neih an tum chu kaltlangpui an tum thu an sawi a, hetihlai hian ZNP chuan an sawrkar laia kawng a chhiat ve tho avangin MNF chu total bandh siam turin an inhmeh loh thu an sawi.

Nimin khan MNF Sr. Vice President Pu Tawnluia, General Secretary Pu Lalruatkima, MLA leh hruaitu dangte’n Aizawl Press Club-ah chanchin thar thehdarhtute kâwmin Total Bandh neih a ṭulna chhan te an sawi a, Pu Tawnluia chuan mipuiin kum 9 zet Congress sawrkar an hrawn chhungin Mizoramah a fur a ṭhala kawngpui zawh tlak mumal a awm loh avangin mipuite’n harsatna nasa tak an tawk mek a ni, a ti a. National Highway, kilometer 1,463 leh State Road Kilometer 4,731 te chu neitu leh enkawltu mumal awm lo ang maiin khawtlang hnatlangin a siamṭhat hna an thawk ṭhin a, lirthei neitute leh enkawltute mangang pawhin hnatlangin a siamṭhat hna an thawk bawk a ti a. Kawng chhia avangin khualzin phur bus, maxi cab leh a dangte tlan thei loin an nuar a, motor chuan man a to a, ei leh bar phurh man a to va, chakkhai lamna kawngpui ber a chhiat em avangin mipuite’n harsatna namen lo an tawk mek a ni, a ti.

Kawngpui chhia siam tha tura hmalak nan MNF MLA pahnihin Assembly Session-ah tum hnih resolution an pu lut tawh a, mahse sorkar lai MLA rual te’n state pumah kawngpui a ṭhat zia leh Lei dawh te pawh a ṭhat zia sawiin pass-pui duh lovin an hnawlsak ve ve, a ti bawk a.

Kawngchhia avanga mipuite harsatna chuan sawrkar ngeng a chhun zawh loh avangin, MNF chuan October ni 13, 2015 khan ‘Kawng siamṭhat phûtna kawngzawh’ an lo nei tawh tih sawiin, Pu Tawnluia chuan, kawng siamṭhatna hun ṭha tam tak an nei a, chuti chung pawha mipuite harsatna sutkian an tum si loh avangin hreh tak chungin MNF party chuan kawng chhe lutuk avanga harsatna tawk mipui thlavang hauhna, Total Bandh hmanga lantir a lo tul ta a ni, tiin hetianga mipui nunphung khaihlaka Total Bandh hial siam a tul ta chu a vanduaithlak a, mipuite mangang au thawm hian sorkar beng harh se an duh takzet zet tih Pu Tawnluia chuan a sawi a ni.

MNF Senior Vice President chuan Mizorama kawng-pui ṭhat lohna chhanah hian corruption nasa tak a inphûm tih a lang nia sawiin, hnamdang contractor-te uchuak taka duhsakin hnungthak inhiah-sak tawnin, Revised Estimate hmangin sum tam tak an siam tlâng ṭhin tih a hriat, a ti a.

Tu ber nge PWD Minister tih pawh a hriat tawh lo nia sawiin, Pu Tawnluia chuan PWD Minister hi tu nge ni a, Chief Minister hian PWD hi enkawl tawh lovin Health Minister hian PWD hi a kawp zawk em ni tih sawrkar an zâwt tih a sawi bawk.

Hetihlai hian ZNP chuan MNF-in Total Bandh siam an tum chu an sawrkar laia Mizoram kawngpui a chhiat ve tho zia mipuiten an sawi thar lehna tur hun remchang an siamsak mai nia an ngaih thu leh MNF chu total bandh siam turin an inhmeh loh thu an sawi ve thung.

Total bandh hi a tuartu chu mirethei, nitina eichawp dapte an nih avangin hmanrua-a hman fo chi-ah an ngai lo tih ZNP chuan nimin khan thuchhuah siamin an sawi.

Kumin budget-ah kawng siamna tur Cheng Vbc 897.14 dah a ni tih sawiin, heti khawp sum awm chung hian kawng hi a chhe em em reng a ni, ZNP chuan an ti a. Mipuite hian kawng tha tak chu an beisei ngam tawh lo a, amah-erawhchu a khuar zual laite hnawhkhat a, roadroller-a chil mam a, tlan theih tawng tawng tura siam hi chu an beisei a ni, an ti bawk a.

ZNP hian MNF sorkar laia Bawngkawn kawngpui peng-ṭhuam zauhna tur vantlang tana mi malin a lo hlan tawha thil fel lo awm chu chhuichiang ngei tura Mizoram sorkar an duh thu pawh sawiin, MNF Gen. Hqrs. President Pu Zoramthanga hminga land lease siam ni si, Pu R.Tlanghmingthanga makpa-in Cheng Nuai 150-a a hralh leh daih thei chu chhuichiang a, thudik mipui hriata puang ngei turin sawrkar an phut tih an thuchhuahah chuan an sawi a ni.