Mizoram University Students’ Council chuan Mizoram University-a Vice Chancellor nghet dah ngiatin nimin aṭang khan an zirna an chawlhsan a, zirtirtute leh hnathawktute pawh office an kai remti lovin an dang.
Hemi chungchangah hian thuchhuah siamin Mizoram University Students’ Council chuan, Union Minister for Human Resource Development, Prakash Javadekar-a hnena lehkha an thehluhah nimin September ni 5 thlenga Vice Chancellor nghet an neih loh chuan Mizoram University-a zirna leh hnathawh dang zawng zawng chhunzawm an phal dawn loh thu an lo sawi tawh angin Zirlaiten Class an kal lova, Zirlai pungkhawmte hian Zirtirtu leh Non-teaching Staff-te pawh an office kai remti lovin office kai tumte pawh an dang tih an sawi a.
Vawi eng emaw zat Central sawrkarah Vice Chancellor nghet an mamawh thu an lo thlen tawh thu te, Mizoram University Teachers’ Association pawhin Press Conference hial nei tawhin Central lam aṭanga chhanna an hmuh mai loh thu te sawiin MZU Zirlaite chuan, hetianga Central sawrkar a ngawi reng hi Mizoram University Zirlaite hmusitnaa an ngaih thu leh vawiin, September ni 6 hma ngeia Vice Chancellor nghet dahsak tura an phutna, thla hmasa ni 28 khan an thlen leh tih an sawi a. Chhanna engmah an dawn loh avangin MZUSC chuan Mizoram University-a zirna lam kaihhnawih leh thil dang zawng zawng an dang chat tih an sawi a. Zirlaite hian “Mizoram University-in Vice Chancellor nghet a neih hma chu academic leh non-academic hna zawng zawng dan chah ni rawh se” tiin resolution an siam nghal a ni.