NLUP Implementing Board chu Chairman Pu JH Roṭhuama hovin NIB Conference Hall-ah nimin khan an ṭhukhawm a, NLUP kalpui mek dan leh dinhmun te, line department hrang hrangte hmalak dan bakah NIB hmalakna tur ruahmanna thar chi hrang hrangte an sawiho a, NIB member te leh Line Department aiawhte bakah sawm an nih angin Land Revenue & Settlement Department Secretary Pu R. Lalramnghaka leh PHE Department Engineer-in-Chief Er. Lalmuanzova te an tel.
NLUP thil tum pawimawh tak pakhat ramngaw humhalh leh tuihna siam kawnga chak lehzuala ke pen turin hmalak dan thar ruahmanna sawiho a ni a, Nodal Department-ah PHE Department hman tur niin, hemi kawnga hmalak a chak lehzual theih nan Committee chhawng 4 – State level, District level, Block level leh Village level-ah te siam niin, member tur te pawh ruat fel nghal a ni a, mipuite leh tlawmngai pawl te a tam thei ang bera inhnam-hnawihtir tum a ni a, heng ruahmanna te hi Chief Minister leh sawrkar hotulu te hnen-ah an pawmpui tura thlen tur a ni.
NLUP hmalakna te uar lehzuala puanzar tum niin hemi atan hian NLUP Line Department te hmalakna chi hrang hrang thlalak nen tarlanna lehkhabu siam tum a nih bakah NLUP Calendar 2018 siam tum a ni a, thiamna bik nei mi chi hrang hrang sawm a, NLUP nihphung leh hmalak dan te, hmalaknain a nghawng rahchhuah chi hrang hrang te zirchiantir a, an zirchianna report changtlung tak siam tum a ni bawk.
Nimin ṭhukhawm hian NLUP Smart Village Scheme chungchang an sawiho bawk a, he scheme hnuaiah hian NLUP dawngtu khua pahnih Chhawrtui leh Phulpui lakluh tum niin, an hmalak dan leh an khawtlangin NLUP nen kal-kawp chunga hmalakna dang entawntlak si hlawhtling taka an kalpui dan te sawi a ni a, heng khaw pahnih te kalphung hi uluk taka zirchiana Mizoram chhung khaw dang te tana ṭangkai tur te zir chhuah tum a ni.
Line Department hrang hrang ten NLUP hnuaia an hmalakna leh sum an hman dan te report an pek bakah NEDP-NLUP Convergence Scheme chungchang sawiho a ni a, heng bakah hian NLUP chungchang seminar buatsaih te, Talk Show buatsaih leh zirlaite pual inelna chi hrang hrang siam tum a ni bawk.
NIB Chairman Pu JH Roṭhuama chuan NLUP kaltlanga hmalakna chi hrang hrangte mipui hriat theih tura tlangzarh lamah nasa lehzuala ṭan lak a ṭul thu leh bihchian ngam an nih thu tihlan a pawimawh thu a sawi a, hmalakna pawh chak lehzuala kalpui tum a nih thu leh MLA bial tinah NLUP la dawng lo 200-400 vel ṭheuh a ṭul dan azira pek leh tum a nih thu a sawi bawk.
Nimina NLUP Implementing Board ṭhutkhawmah hian official member leh non-official member bakah Line Department aiawhte an tel a ni.