Ration buhfai thla 2 vel dawng tawh lo

In 220 vel awmna Selam khua chuan Ration buhfai thla hnih vel an dawn tawh loh avangin mipuiten harsatna an tawk mek niin AIR chuan a tarlang.

Supply buhfai hi Hnahlan Kudam aṭanga la ṭhin an niin Selam leh Hnahlan inkar kawng a chhiat nasat avangin eng lirthei chi mah a kal thei lova, Supply buhfai retailer-in a lakluh theih loh avangin buhfai neilo ṭhahnem tak an awm tawh a, chhungkaw ṭhenkhat chua vaimim leh thlai hnahte chaw ah an ring hial tawh a, Buhfai leh buhhum ngah deuhte ta a neilo ten pûkin buhfai awm ang angte an eiho hlawm a ni.

Selam YMA vice President N.Lalhmachhuana sawi danin Selam hian Tualcheng kaltlangin Hnahlana mi supply buhfai an la ṭhin a, Tualcheng leh Selam inkar kawng chu tuihawkin a la khuar nasain lirthei an tlan thei lova, nimin khan khawtlangin kawng siamin hnatlang an nei a, Pick up Pakhat chu Hnahlan a buhfai phur turin a kal chhuak thei hram a ni.

Hetihlai hian tlang hrilengin he khua hi a tuam mek a, hritlang khawsikin mi tam tak a tlakbuak mek a ni.

Kawngchhiat avang hian Selam leh Champhai inkar maxi cab service pawh tihtawp a ni tih AIR chuan a tarlang bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram