Chief Minister Pu Lal Thanhawla chuan sawrkarin ṭhalaite tana khawvel thar a siam mekah a bikin infiamna khawvelah hlawhtlinna nasa tak a awm chho mek a, zirna lamah pawh hmasawnna lian tham awm chho turin theihpatawp chhuah mek a ni a ti a. Mizo mipui in an thiam leh an ngaihnat rimawi khawvelah pawh thalai talent nei tha tam tak an awm a; anni tih hmasawnna leh chawikan nan hian sawrkar chuan ngaihtuahna a seng mek a ti.
He thu hi nizan hmasaa Berawtlang Art & Culture Conference hall-a Mizo Zaimi Inzawmkhawm (MZI)-in an pawl din champha vawi 37-na an lawmnaah Chief Minister hian a sawi a, Pu Lal Thanhawla chuan Mizoram chhung kil tinah, thingtlang khawte zawkah te pawh zaipawl ṭha tak tak a awm vek a, keini ang hi a state mai ni lo, a ram ang pawhin khawvel hmundangah hian an tam lo maithei, hei hian rimawi kan hmelhriatna a rei loh ang hu in rimawi khawvel a kan san zia a ti lang a, a pawimawh ber pakhat, engkim thiam zung zung nghal thei Zofaten kan hriat tur chu, a hmawrbawk uluk a ni a ti a, Rimawi khawvela Zofate an hlawhtlinna tur chuan hnamdang ṭawng thiam, hnam-dang culture hriat leh hnam-dang te hriat lâr tur a feh-chhuah leh inpholan, exposure nasa zawk a pawimawh a ni a ti.
MZI 37th Rising Day lawmna inkhawm hi an pawl President Pu Lalrinmawia Ralte, MLA in a kaihruai a, he hunah hian MZI member fam ta – Pu Michael M. Sailo leh Nl. JH Lalmuanpuii (Mami), Mamit te sunna hun hman a ni a, Chief Minister hian tuilian vanga ṭanpui ngai te puala MZI in Charity event hrang hrang a buatsaih zinga HELP-Rock For Mizoram Concert Music Video album pawh mipui lei theih turin a tlangzarh nghal a ni.
MZI Gen. Secretary Isak Malsawmtluanga’n an pawl hmalakna leh hmachhawp te a tarlan dan chuan MZI Artist te minimum wage/ vawikhat zaina a hlawh hniamber chu Rs.3500 a ni a. Tunah hian MZI chuan Band tan minimum wage a siam leh mek a, hlaphuahtute tan pawh an hla hralh theihna tur digital market buatsaih mek a ni a, India ram chhung leh pawna zaimi te an fehchhuah awlsam zawk nan Website buaipui mek niin hetih lai vek hian Company pakhat nen a Music Fest 2017 huaihawt an tumna pawh chak tak a kalpui mek a ni.
Tunhnaia ruahsur, tuilian leh leimin avanga harsatna tawktute puala MZI General Headquarters in Charity Event hrang hrang a buatsaih aṭanga sum a hmuh zawng zawng chu Rs.8,61,577/- a ni a, heta ṭang hian CM Relief fund atan Rs.2,00,000/-, Tlabung khaw tan Rs.1,02,500/-, Phairuangkai khaw tan Rs.1,01,300/-, Sairang khaw tan Rs.1,00,000/-, Saron Veng tan Rs.1,00,000/-, Marpara ‘S’ khaw tan Rs.1,01,500/-, Changpui khaw tan Rs.1,01,200/- leh Kolasib MZI hnenah Rs.55,077/- ,ah te sem sawm a ni