Zothlifim Logo
Loading ...

World Cup qualifying-a South Africa leh Senegal te inkhel chu an inkhelhnaa match referee chu a damchhung atana FIFA-in an hrem avangin inkhelh ṭhattir leh a ni dawn.

Ghanaian Referee Joseph Lamptey hian nikum November-a South Africa leh Senegal te an inkhelh ṭumin handball tiin South Africa chu penalty a hmuhtir a, hetah hian South Africa chu 2-1-in an chak phah a, mahse replay-ah chuan Senegal defender Kalidou Koulibaly khûp-ah ball hian a fuh zawk a, Lamptey hian tihluihnaa match a kal danglamtirah puhin FIFA chuan March thla khan damchhunga Footballa inrawlh theilo turin an hrem ta a, he match pawh hi November 2017-a inkhel ṭha turin an ti ta bawk a ni.

Hetihlai hian Court of Arbitration for Sport chuan Nilaini-a he thutlukna siam hi kaltlangpui lo turin a la ti rih a, hnehna changtu zawk South Africa chuan FIFA thutlukna hi khinlet an tum thu an sawi tawh a ni.

Senegal leh South Africa te hi World Cup Qualifying Africa Grou-D-ah pathumna leh palina an ni mek a, an chungah hian Burkina Faso leh Cape Verde Islands te an awm a, he Group-a a sang ber hi nakuma Russia-a World Cup khel turin an tling dawn a ni.

Ghanian referee hian tunhma pawhin chanchin mawi lo alo nei zauh zauh tawh a, kum 2010 khan African Champions League semi-final-ah chiang taka goal benglut chu a pawmsak a hei vang hian Confederation of African Football (CAF) chuan an hrem (suspend).

Nikum khan African Cup of Nations qualifying round-ah Congo leh Angola inkhel enkawlin hun pekbelh hnuah minute hnih a khelhtir a, Angola hi awm ang lo taka penalty pe zuiin Angola-in penalty an pet goal rualin inkhel a titawp nghal tawh bawk a ni.