Chief Minister Pu Lal Thanhawla chuan NLUP chu NEDP hmanga dawm chhoh zel tum a nih angin se vulh duhtu te chu NLUP ṭanpuina hmanga chhawmdawl an ni ang a ti.
He thu hi Inrinnia Aijal Club-a neih One Day Stakeholders Workshop on Semi-Intensive Mithun Farming as Alternative Livehood a hman-puinaah Chief Minister hian a sawi a, he workshop hi Indian Council of Agricultural Research (ICAR) – National Research Centre on Mithun, Medziphema, Nagaland leh Animal Husbandry & Veterinary (AH & Vety) Department te ṭangkawp-in an buatsaihah niin, mithiam ten Champhai, Saiha, Aizawl, Serchhip leh Lawngtlai District se vulhtute chu sial enkawl dan leh se vulh hlâwk zawka kalpui a nih theih dan te an zirtir a ni.
Chief Minister chuan India rama sevulhna hmun, hmarchhak state zinga se vulh tlem ber aṭanga a vulh tam ber ni tura ṭan lâk chu a pawimawh bakah sum leh paia intodelhna thlen theitu a la ni dawn a ni a ti a, India ram boruak te thlirin, “Sakhaw chi tinreng te paw’n sa ei theih a an pawmtlan, sakhuanna pawisawilo, Secular Meat a nih bakah a hnute thlengin Secular Milk a ni a, sum thawhchhuahna kawngah a hlâwk chho zel dawn niin a lang a, chuvangin sevulh hi ranvulhtu te’n kan intihhmuh chhoh zel a ngai a ni,” a ti.
Chief Minister chuan sawrkar hnathawk leh ram hruaitute chu kuthnathawktu te leh mi harsa te ṭanpuia, kaihruai tura awm an ni a ti a, Sawrkar mithiamte pawh kuthnathawktu harsa zawk te sum senga Aizawl a koh loh hram dan dap ṭhin tur leh a theih chin chinah anmahni va pan mai ṭhin turin a chah a ni.
Thusawitu dang, Department of Agriculture Research & Education(DARE) Secretary leh ICAR Director General ni bawk Dr. Trilochan Mohapatra chuan se vulhtute tihhmasawn-na turin ICAR chuan Demonstration Centre/Unit 2 kumin chhungin rang taka Mizorama siam an tum dawn tih a sawi a, Mizoram sawrkar hmalakna tichak tur leh thawhpui turin kumin September thla tawp lam-ah chuan thawhhona thuthlung ziahfel hman ngei a beisei thu a sawi a, se vulhtute’n ṭhal chhunga ranchaw pek tur an neih theihnan, Feed Block Machine bun dan kawng dap tum a nih thu a sawi a, hnathawk ṭha te puihna kawngah ICAR in sum a ren lovang a ti bawk.
Sevulh inzirtirna hun hawnnaah hian Pu Dr. Lalhming-thanga, Dy Dir, AH & Vety chuan Rs.39,09,32,804.00 a lian Project, ‘Mizoram Mithun Pro-duction & Development Project (MMPDP)’, Thenzawl a kalpui a nih dan tur a sawifiah a, ICAR thiamna thawlhchhana kalpui tur, Mizoram Mithun Production & Development Project hi Phase angin kalpui a ni dawn a. Phase-I kalpuina turin Rs.3,82,92,563.00/- chu NEDP aṭanga hmuh tawh a ni a, phase dang kalpuina tur leh sum hnar tur pawh chinfel thawkhat a ni tawh a ni.
MMPDP kalpuina tur hian ram, hectare 20,000 a zau ruahman a ni tawh a,Project chhungah hian ran inthlahpunna leh vulh thauna hmun Ranch panga siam, Intensive Mithun Stud farm, Seed center, Off-farm Infrastructure leh Technical services te khung tel a ni a. MMPDP Sevulh hmalakna hian bawnghnute dehchhuah, sa ei tur chhawpchhuah, savun hralh tur buatsaih leh hnathawka chhawrtur sechal tam zawk neih te chu a tum a ni.
Livestock Census 2012 in a tarlan a nih dan chuan Mizoram-ah sial 3,212 vulh mek a ni a, heng zinga 1858 chu Champhai District khaw 26-ah, 1219 chu Saiha District khaw 10-ah leh a dang tlem a zawng te chu Aizawl leh Serchhip Dstrict-ah te vulh a ni.