Inrinni khan Science Tea-chers Association of Mizoram (STAM) huaihawtin sikul ṭan chungchang (school timing) inrawnkhawmna /sawihona neih a ni a, YMA-in a ngaia kal an duh laiin zirtirtu lam chuan tihtlai an duh thu an sawi.
School timing chungchang sawihona hi STAM President Pu C.Lalrosanga chuan kaihruaiin, Pu RK Lianzuala kaihhruaina hnuaiah pawl hrang hrang ten school timing chungchanga an ngaihdan an sawi a, Central YMA chuan a ngai (dar 8-a ṭan) anga la kal a, enchhin deuh hrih an duh tih an sawi a, MUP chuan an ngaihdan chu 50/50 a ni tiin MHIP chuan meeting-ah an la sawiho lo niin an sawi.
Inrawnkhawm na a tel zirtirtu pawl hrang hrang aiawhte chuan sikul ṭan hma chu hmun hla zawk aṭanga kal zirlaite tan harsatna a siam nasa nia sawiin, ṭan hma vangin zirlaiten zirna hun an nei tam chuang lo tih an sawi a, pum ṭha lo an tam phah niin an sawi bawk. Sikul ṭan hma vangin naupang zingah luhai, pumna leh luak an tam tih sawiin, tlaia an bân hma vangin zirlai tam takin ruihhlo bakah inngaihzawnna kawngah nghawng ṭha lo zawk a nei nia an hriat thu an sawi bawk.
Inrawnkhawmnaah hian YMA, MUP, MHIP, MSU, zirtirtu pawl hrang hrang bakah sawm bikte an tel a ni.
STAM-in nu leh pa, zirtirtu, zirlai, traffic police leh driver mi 4816 zawhna (Questionnaire) an neih aṭanga a lan danin zing dar 8-a sikul tan ṭha ti hi 1343 (27.89%) awmin, ṭha ti lo 3250 (67.48%) leh ngaihdan nei lo 184 (3.8%) an awm a, Nu leh pa, zirtirtu leh zirlai mi 4695 te hnenah ‘naupangte hriselna a khawih pawi em?’ tih chu pawi ti 2161 (46.02%), pawi lo 2240 (47.7%) leh ngaihdan nei lo 294 (6.26%) an awm a, nu leh pa 1896 te hnenah school ṭan hun atana an duh ber an zawhna chu dar 8 duh 172 (9.07%), dar 8:30 duh 670 (35.34%), dar 9 duh 851 44.88%) leh 9:30 duh 203 (10.7%) an awm a ni.
(Source: Zalen)