Mizoram Truck Owners’ Association (MTOA) leh Mizoram Truck Drivers’ Association (MTDA) te chuan kawngpui siamṭhat a nih theih nan nimin aṭang khan an lirtheite an chawlhtir.
MTOA Gen Secretary Pu Dina Tlau chuan Mizoram PWD hotute’n truck a tlan reng avangin hnathawh a har thu an sawi ṭhin a, hna an thawh theih nana ding an nih thu leh tunkar Nilaini thleng an din dawn thu a sawi a, an tlan loh tur thu hi Silchar Truck Union te an hrilh lâwk avangin niminah phai lam aṭanga truck rawn chho a awm mang lo a, indan buai a ngai lova, an tlan loh tur thu-ah hian sawrkarin a be hran lo va, anni pawhin an be bik lo tih a sawi bawk.
Tarlan tawh angin, MTOA leh MTDA-te hian hun enge-maw chen kawng siamṭha tura sawrkar an ngaihchân hnuah siamṭhat a nih tak loh avangin, hnathawktute’n thawl zawka kawng an siamṭhat theih nan nimin aṭanga Nilaini thleng hian Mizoram pumah bungraw phur truck zawng zawngte an tlan dawn lo tih an sawi a, hei hian State dang truck pawh a huam dawn a, Mizorama rawn tlan lut bungraw phur truck te pawh dan vek tum a ni tih sawiin, Truck ruak haw lam erawh an hmalakna hian a huam ve dawn lo tih an sawi a ni.
MTOA hian thlahlui August ni 18 khan Sairang leh Khamrang inkar kawng Silchar leh Aizawl inkar kawngpui chhe zualpui thawmṭhat nan lung truck lian trip 5 leiin hnatlangin kawng siamṭhat hna hi an lo thawk tawh a, August ni 3 pawh khan Kolasib leh Rengte inkar kawngpui Bairabi kawng chhe zualpui lai chu Cheng Nuai 3 sengin an lo siam tawh bawk a ni.
Hetihlai hian Champhai leh Aizawl inkara tlan ṭhin Maxi Cab te chuan kawngpui siamṭhat an duhna lantir nan leh hun rei tak harsatna an tawhte mipuiin an hriatpui theihna turin tunkar Nilaini aṭanga Inrinni thlengin Service loh nise an ti ve leh bawk a ni.