Tunhnai ruah sur nasa avanga Keiṭum to Arṭahkawn Road-a Tuichang Lei innghah-na (foundation) tlahniam nia hriat leh sawi chu PWD Serchhip Division-a Engineer-ten kar hmasa khan a hmunah tlawhin an enfiah a, nimin khan siam ngai ṭhenkhat siamin hna an thawk bawk a, lei innghahna hi a tlâkhniam loh thu leh lei kaina (approach) zawk a tlâk hniam deuh thu sawiin, lei hi a la him thu an sawi.
He Lei hi kum 1985 a siam niin Keiṭum lam aṭanga Lei luh kaina approach slab chu concrete-a chhung lovin, leivunga chhun khah (Earth filling) a ni a, a hun lai hian mumal taka tihmuk (compait) a ni lem lo bawk a, hei hi khua reiah rawn lang chhuakin, tunhnai ruah sur nasa nen a tla muk ta a, chu chuan khuar a siam ta niin sawrkar thuchhuah chuan a tarlang a, lei tla muk hian Lei hi a nghawng lo niin a hmuna endiktu SDO Pu Lalmuanpuia leh Junior Engineer ten an sawi a, nimin khan he lei tla muk hi thawktute hian leivungin an chhûng khat nghal nghe nghe a, nimin vek khan Tuichang leh Keiṭum inkara kawng khuar chhe zual lai te leiin an hnawh khat nghal bawk.
PWD Engineer leh thawktuten he Lei kaina an siam hi Serchhip IPRO Pu K. Saitluanga pawhin a telpui a ni.
Tuichang Lei hi tunah hian Central Road Fund cheng nuai 754.75 senga dawh ṭhat tuma hmalak mek a ni a, hna hi M/s Sadguru Engineers & Allied Services Pvt. Ltd hnenah pek niin Double Lane PSC Girder a dawh tur a ni a, December 2018 a thawh zawh tura ruahman a ni a, Contractor hian tunah hmanruate lakhawmin foundation dahna tur te pawh an lai ṭan tawh nghe nghe a ni.