Nimin khan Tuichang lei (bridge), Keiṭum lam hnaih tlahniam chu a hmunah Hrangturzo bialtu MLA Pi Vanlalawmpuii Chawngthu-in a tlawh a, PWD Serchhip Division SDO Pu Lalmuanpuia leh JE Pu R.Lalrohlua ten an ṭawiawm.
Pi Vanlalawmpuii chuan vawiin (12.9.2017)-ah hnawh-khaha siamṭhat hna thawh nghal a nih tur thu a sawi a, lei mai bakah hian Hrangturzo bial chhunga fur ruahtui tlâk nasat avanga kawng khuar nasa zual pawh hnawhkhah a, siam nghal tum a nih thu a sawi bawk.
Tuichang lei hi kum 1985 kuma siam a ni a, he lei hi Keiṭum lam zawmna lam a tlahniam a, lei ban erawh a hrana ding a nih avangin zin veivak tan a hlauhawm rih loh tih MLA chuan a sawi a, he lei (bridge) hi lei tlahniam hian a nghawng lo tih Bialtu SDO te chuan Bialtu MLA an lo hrilh bawk a ni.
Tuichang lei hi kawng pawimawh tak a nih avangin lei thar dawh tura hmalak mek a ni tih thudawnna chuan sawiin, PSC Girder bridge siam tum a ni a, fur ruahtui tuihul lamah chak zawk leh nasa zawk a hmalak chhoh zel a ni bawk dawn a ni.
Tuichang lei hi 10 MT chauh phur zawh theih tura tih a ni tawh a, tunah hian 5 MT phur chauh zawh theih tura DC hnena thlen tum a ni tih thu-dawnna chuan a sawi bawk.