Rafael Nadal chuan Kevin Anderson hnehin US Open-ah a champion a, Grand Slam title 16 a ta a ni.
World No. 1 Nadal hian Pathianni-a Flushing Meadows-a final khelhah hian 6-3, 6-3, 6-4-in hnehna a chang a, hei hi US Open title ṭum thum a lakna a ni a, kum 2013 hnua a vawi khatna atan kum khat chhunga Grand Slam title pahnih a lâk lehna hmasa ber a ni a, June thla khan French Open title a lo la tawh a ni.
Kum 31-a upa Nadal chuan, “Kumina thil thleng hi beisei phak bak a ni,” tiin a sawi a, “Kum engemawti chhung chu harsatna hrang hrang – hliam te, khelh ṭhat theih mang loh nen hun ka hman hnuah tun season chu a bul aṭang khan mi a tiphûr takzet zet a ni,” tiin a sawi bawk.
Nadal hian a coach, a patea (uncle) Toni nena Grand Slam tournament an khelh hnuhnun ber tur chu kumin US Open hi a ni a, 2018 aṭang chuan Carlos Moya nen an thawk dun dawn a ni.
Roger Federer chu Grand Slam title la tam ber a la ni zel a, title 19 a la tawh a, Nadal hian French title 10, US title 3, Wibledon pahnih leh Australian Open title pakhat la tawhin, Grand Slam title lak tamah Federer hi pathumin a phâk lo mek a ni.
Kum 31 mi, Anderson hi Grand Slam final khel phak zinga player sâng ber a ni a, 6ft 8in-a sang niin, tournament-ah pawh ace nei tam ber niin 114 lai a nei a ni.