Venus Williams chuan Grand Slam semi-final a thlen ṭum 23-na ni turin Petra Kvitova hnehin US Open Semi-Final a thleng ta.
Kum 37 mi, Williams hian 6-3, 3-6, 7-6 (7-2)-in hnehna a chang a, hemi te pahnih hi an inhnehtawk thei hle a, ṭum 5 an inkhelh tawhah set 3 an khelh an la mamawh zel a, Williams hian Semi-Final-ah hian a American pui Sloane Stephens a hmachhawn dawn a, nizanah Madision Keys leh Coco Vandeweghe te an chak a nih chuan all-American Semi-finals a ni dawn a ni.
Kum 24 mi, Stephens pawh hian Semi-Final thleng turin set 3 bawk a mamawh a, Anasatasija Sevastova chu 6-3, 3-6, 7-6 (7-4)-a hnehin a vawi khatna atan US Open semi-final a thleng a, tun ṭum hi Grand Slam semi-final a khelh vawi hnihna tur niin, kum 4 liam ta khan Australian Open Semi-Final a lo khel tawh a ni.
World No. 83 Stephens hi a ke hliam vanga thla 11 a chawlh chhungin rangking-ah pawh 957-naah a tla thla hman hial a, a rawn kir aṭanga thla 2 hnu lekah Grand Slam semi-final rawn thlengin top 40-a kai leh chu a tum hmasa a ni.
Mipa lamah South Africa’s Kevin Anderson chuan 7-6 (7-5), 6-7 (9-11), 6-3, 7-6 (9-7)-a Sam Querrey hnehin major tournament-a Semi-Final a thlen vawi khatna a tawn bakah kum 2003-a Australian Open-a Wayne Ferreira hnua South African zinga Grand Slam semi-final thleng leh hmasa ber a ni bawk.
Anderson (6ft 8in) leh Querrey (6 ft 6in) te hian Open Era-a Grand Slam Quarterfinal, Semi-Final emaw Final match-a inkhel sâng ber record an siam nghe nghe a ni.
28th Seed Anderson hian Semi-Final-ah hian Pablo Carreno Busta a hmachhawn dawn a, 12th seed Carreno Busta hian 6-4, 6-4, 6-2-a Diego Schwartzman hnehin Semi-Final hi a lut ve bawk a ni.