Kumin October 17 atanga 19-a Champhai Zotlang Branch YMA in YMA General Conference vawi 71-na a thlen tura inbuatsaih dan leh hmalak dan thlirhona Champhai DC Conference Hall-ah neih a ni.
Champhai DC Pu Vanlalngaihsaka kaihhruai ṭhutkhawmah hian YMA General Conference Organizing Committee Chairman Pu H. Laltuliana chuan hmalakna tlangpui tarlangin, Zotlang Branch YMA leh khawtlang aṭanga hmalak tur pawimawh zualte chu thui tak hmalak a nih tawh thu leh Pandal Structure chu Silchar Chakeshawari Tent House a mite sak tura tih a nih thu te, Pandal hi mi singkhat leng thei tur, a dung ft190 leh a vang ft160 a zauva sak tur chu September 15 aṭanga ṭan tur anih thu a sawi.
Champhai DC chuan sawrkar Department hrang hrang, a bikin Power & Electricity Department (P&ED) aṭanga êng pek beisei a nih dante, Public Health Engineering Department (PHED) aṭanga Tui hnianghnar pe tura beisei a nih dan te, Public Works Department (PWD) aṭanga Pandal hmunhma leh khawpui chhung aṭanga a panna kawngpui sawngbawl tura beisei a nih dan leh Champhai panna kawngpui cheiṭhat dante, Eirawngbawlna Gas leh Oil hniang hnar taka dawn a nih theihna te, Mizoram Police Department leh Excise & Narcotics Department aṭanga dan leh thupek kengkawh tura beisei a nih bakah lirthei chevel felfai taka khuahkhirh tura beisei a nih dan te Pu H. Laltuliana chuan a tarlang a, YMA General Conference neih chhunga Champhai khawpui huamchhunga Wine-shop chu khar rih ni theise an duh thu leh lirthei vakvel a thawl theihna tura Conference neih chhung hian Myanmar aṭanga lakluh Kuhva ro chu ritphur lirthei lian chiten phurhluh rih loh ni thei se an duh thu nimina meeting naah hian an tarlang a ni.