MNF party chuan Zo-Carbon chhui tura CBI ko lût tura ngenna Congress sawrkarin a sût nia sawiin nimin khan Chief Minister Pu Lal Thanhawla hnenah Lottery sum chingpen chungchang leh Zo-Carbon-a sum dik lo taka eirukna chungchangah lehkha an thehlut nawn leh.
Hemi chungchang hi thuchhuah siamin MNF Gen Hqrs. chuan, Zo-Carbon chhui tura CBI ko lût tura ngenna Chief Minister-in tifel tawh anga a insawi chu thla khat ral hnu lekah a sut leh a, hemi chungchang an zawhfiahnaah Chief Minister chuan “High Court-ah mi pakhatin PIL case a thehluh thubuai kal lai a nih avangin CBI koh luh a rem lo” tiin a lo chhang a ni a ti a; High Court-a PIL pawh CBI kuta dah tura ngenna tho a ni a, a remlohna an hriat loh thu Chief Minister an hrilh pawhin CBI ko lut tur ang zawngin chhanna an dawng lo, an ti.
Lottery sum chingpen chungchanga Chief Minister-in tun thla ni 1-a an lehkha a chhannaah Lottery Distributor-te inkhinna a awm rih avangin CBI chhuitir a rem rih lo anga a ziak chu a remlohna a awm a an hriat loh thu sawiin MNF hruaitute chuan hriatthiam har an tih thu leh a ruka hêl tumna awm nia an hriat thu Chief Minister hnenah hian an thlen a; Chief Minister chuan a Ukil-te’n thu an hrilh dan a ni a, a tih dan an hria a nih chuan lehkha rawn siam se, hming a lo sign ang, tiin a lo hrilh tih MNF chuan an sawi bawk.
MNF chuan Lottery leh Zo-Carbon chungchanga thil dik lo lian tak tak inphumte chu hai chhuah a nih theih nana Chief Minister-in hma a la lo a nih chuan amah ngei pawh tel vea an ngaih tur thu leh, heng case 2-te hi CBI kuta a hlan lo a nih chuan Court hmangin emaw, kawng dangin emaw CBI kuta dah tura hmalak chhunzawm zel an tum tur thu Chief Minister Pu Lal Thanhawla hnenah hian ziakin an thlen a ni.