Zothlifim Logo
Loading ...

Leicester City chuan an manager Craig Shakespeare chu manager nghet ni tura kum 3 daih contract a ziak aṭanga thla 4 hnu lekah an bân.

Foxes hi Premier league-ah a hnuai lam aṭanga pathumnaah an awm mek a, league match hnuhnung parukah hnehna an chang lo vek a, tuna an ban tak kum 53 mi, Shakes-peare hian February thla khan Claudio Ranieri thlakin a nghet lovin Leicester hi a enkawl ṭan a, season liam ta khan Leicester hi a him chinah 12-na a nihpui hnu-ah June thla khan manager nghet turin contract ziakpui a ni ta a ni.

Shakespeare hian season liam taa game 16 a khelhpuiah game 8-ah hnehna a chanpui a, Leicester chu Champions League quar-terfinal a thlenpui bawk a, Leicester hian seson liam ta pawh khan league match 6 an chak loh hnuah Premier league-a champion puitu Ranieri chu an bân a, tun season-ah hian match 10 khel tawhin match 3-ah an chak a, match 4-ah an chak lova, draw pathum an nei a, an hnehloh zingah hian Arsenal, Manchester United, Chelsea leh Liverpool te an tel a ni.

West Brom hi manager che ṭha lo te tan chhiatna niawma mawi an ni a, West Brom player hlui Shakespeare pawh hi tun hnai kum 5 chhunga West Brom nena an inkhel zawha manager bân tawk 7-na a ni a, West Brom nen an inkhelh zawh hnu lawka tunhnai kum 5 chhunga bân zingah hian Mick McCarthy (Wolves manager, 2012), Andre Villas-Boas (Chelsea, 2012), Roberto Mancini (Manchester City 2013), Paolo di Canio (Sunderland 2013) leh Chris Hughton (Norwich 2014) te an tel a, Sir Alex Ferguson pawh kha 2013 May-a Baggies nen 5-5-a an indraw hnu khan a châwl zui a ni.