Tunhnaia Kawrthah khaw bula Pu Hmingchungnunga te nupa tualthih chungchangah Police te chuan an fapa chu a thattu a ni ngei tih finfiahna ṭha tawk an nei tawh niin an sawi.
Pu Hmingchungnunga leh a nupui Pi Roziki thah an nih chungchangah hian Lalnun-mawia hi a inpuang tawh a, Police hmaa a inpuan mai bakah Magistrate hma-ah pawh a inpuang tawh nia thudawn a ni a, hei bakah hian a inpuanna bawhzuiin tualthahna atana hman thingfak leh chempui pawh Police hian an hmu chhuak tawh niin Mamit District SP Pu Narayan Thapa chuan a sawi. Tualthah laia a hâk kekawrbul leh T-shirt bakah a pheikhawk bun leh Rs.20,000/- a rûk aṭanga la bâng Rs.13,800/- hmuh lêt a ni bawk a, he’ng thilte hi Aizawla Forensic Science Laboratory-ah thawn a ni tawh a ni.
Pu Narayan Thapa chuan an thil chhui kawngah hian duh ang tawka thu an zawh fiah tawh avangin tualthattu a puh Lalnunmawia hi Inrinni khan court chuan judicial custody-ah hreng zui in Mamit district Jail-ah dah luh a ni.
Pu Hmingchungnunga te nupa ruang hi an kuhva huan thlamah tun thla ni 14 khan chhar a ni a, Police te chuan an thih hun hi October ni 12 zan a nih an rin thu an sawi a, an taksa-ah hian thil hriam leh hriam lova khawihna hnuhma engemaw zat hmuh a ni.