Zothlifim Logo
Loading ...

Mizo National Youth Front (MNYF) Headquarters chuan Mizoram Public Service Commission (MPSC)-a Commission member pakhat chauh awm laia hna thar lak hi felhlela kan hriat avangin a rang thei ang bera MPSC member thar ruat thuai turin Mizoram sawrkar an phut.

Nimin khan MNYF hian thuchhuah siamin MPSC Chairman leh member pakhat an pension avangin Chairman tura ruat lawk pakhat chauh Commission member-ah hian a awm mek tih an sawi a, hna thar lak tur interview buatsaih a nihin Commission member aiin sawrkar hnathawk, expert member-te’n interview mark an nei hnem zawk chu MNF ṭhalaite chuan fuh lovaan ngaih thu an sawi a, hei hi Congress sawrkarin MPSC a control theihna kawng leh, hei hi an duhsak zawngte thun theihna a nih avangin ṭhalai lehkhathiam hna zawng mekte’n MPSC-ah rinna an hloh mai ang tih MNF ṭhalaite chuan an hlau hle tih an sawi a ni.

Hei bakah hian MPSC exam application fee chu an zir chian hnuin kan chhehvel state dangte aiin a sang filawr hlea an hriat thu an sawi a, hei hi sawrkarin MPSC hnena revenue atana cheng nuai tam tak chhûng lût tura a tih vang niin a lang, tiin, hei hi MNF ṭhalai chuan Mizo ṭhalaite rawk a tumna nia an ngaih thu an sawi a, MPSC hnuaia exam application fee Rs.270/- lai an chawi ṭhin chu sâng hlea an hriat avangin Rs.150/- aia sâng lova tihniam turin sawrkar an phût tih an sawi bawk.