Zothlifim Logo
Loading ...

Nimin khan Agriculture Conference Hall, Serchhip-ah District Level Oil Palm Growers’ Meet 2017 neih a ni a, Serchhip District-a Oil Palm chingtute thar chhuah chu Godrej Agrovet Ltd. Oil Palm Mill, Bukvannei-a hralh turin ruahmanna duan a ni.

Nimina Oil Palm chingtute intawhkhawmna hun hi Pu J.Lalzamliana, MAS, Director of Agriculture (CH) chuan khuallian niin a hmanpui a, Pu J.Lalzamliana chuan thusawiin, Oil Palm-a Serchhip leh Aizawl District bialtu company, 3F Agrotech Pvt. Ltd. chu an inhnuhdawh tak avangin Serchhip District-a Oil Palm chingtute thar chhuah chu Godrej Agrovet Ltd.-in an Oil Palm Mill, Bukvannei-a an her tura leisak turin ruahmanna siam a ni tih a sawi a, tun dinhmunah Oil Palm man chu Kg. 1 Rs.5.50 a ni a, a rate hi helaia duh duha tihdanglam ngawt theih a ni lo tih a sawi a, India rama Oil Palm rate bituktu Commission for Agricultural Costs & Prices (CACP) hnen-ah hmarchhak state te chu India ram hmun dang rate anga hrut rual chi a ni lo tih an thlen hnuah tunah hian he Commission aṭang hian Mizorama Oil Palm chinna te a hmuna entu tur te an lo kal dawn tih a sawi a, hetihlai hian company-in Kg. 1 Rs.5.50-a an lei bakah sawrkar chuan NEDP aṭangin Oil Palm chingtute chu Kg. 1-ah Rs.1/- zel subsidy pe-in Oil Palm rah chu a chingtuten Kg. 1 Rs.6.50-in an hralh thei dawn tih a sawi a, Serchhip District-a Collection Centre hrang hrang aṭanga Oil Palm Mill, Bukvannei thleng phurhna man pawh NEDP aṭang-in pek a ni dawn a, heng sum te hi Bank Account kaltlanga pek vek a ni dawn tih a sawi bawk.

Pu J.Lalzamliana chuan tun hma chuan Serchhip District-a Oil Palm chingtute thar chhuah chu sawrkar nen inremna an neih angin 3F Agrotech Pvt. Ltd. chuan an huanah an leisak a, amah-erawhchu a herna tur khawl an neih loh avangin an oil palm leisa te chu an leina hmunah an kalsan zel a ngai a, tunah chuan an thar chhuah te chu paih tura leisak an ni dawn tawh lova, India economics hawlh thleng thei turin an thlai thar te an hralh chhuak tawh dawn tih a sawi a, amah-erawhchu Oil Palm leitu turten Oil Palm quality ṭha ngei lei an duh avangin a chingtute pawhin an Oil Palm hralh tur te chu a quality an ngai pawimawh tur a ni tih a sawi a, sawrkarin loneitute tana ṭha turin rua-hmanna siam mahse loneituten an ṭawiawm ṭhat loh chuan a hlawhtling thei dawn lo a ni a ti a, tunah hian Serchhip District bial turin Company dangte pawh ngaihtuah an ni ang a, hetiang ringawt chuan loneitute kalsan an tum lo tih a sawi bawk a, tuna inhnukdawk ta, 3F Agrotech-in kumina Oil Palm an leina pawisa a batsak pawh loneituten an hmu ngei dawn tih a sawi bawk.

He hun hi Pu James Lalsiamliana, MAS, District Agriculture Officer, Serchhip kaihhruai inkhawmah hian Pu Lalruatkima, Sr. Development Officer, Godrej Agrovet Ltd. pawhin thu sawiin, Serchhip District-a Oil Palm chingtute chu an thar chhuah zât zât an leisak thei dawn tih a sawi a, chutihrualin leisak tur a awm mang lovang tih chu an hlau tih a sawi a, tunah hian an company chuan Oil Palm thar 15000MT chuang an lei tawh a, heng zinga 65% chu Mamit District aṭanga an lei a ni a, a dang 35% chu Kolasib District aṭanga an lei a nih thu sawiin, Oil Palm lei kawnga an harsatna lian ber chu inkalpawhna kawng ṭha tawk lo a nih thu a sawi bawk.

He huna report aṭanga a landanin Serchhip District-ah kum 2013-14 aṭang khan Oil Palm lei ṭan niin, kumin May thla thleng khan Oil Palm chingtuten 1608.64 Qtl. an hralh tawh a, tunah hian Serchhip District chhungah Oil Palm chingtu hi chhungkaw 600 bawr vel awm anga chhinchhiah a ni.

He hunah hian Serchhip District-a Oil Palm chingtu te, Agriculture Department leh Agrovet Company aiawhte chuan zawhna leh chhânna hun an hmang bawk a, he hun hi MJA, Serchhip District Member ten an hmanpui a bawk a ni.