Champhai Zotlanga YMA General Conference 2017 neih meka rorel palaite chuan rorel tura chhawp chhuah Agenda te pawm vekin, YMA Kumpuan atan “Ram leh Hnam humhalh an thlang nawn.
Nimina rorel Inkhawm hi Central YMA President Pu Lalbiakzuala’n a kaihruai a, rorel palai mi 1478 te chuan tluang taka ro relin ngaihtuah tura chhawp chhuah zawng zawng an ngaihtuah hman a, an pawm vek a, Agenda an pawm takte chu YMA khawih 5 – Mizo lengkhawm khawhar hla kan neihte hi thangthar ten a thluk kan hriat reng theihna turin Solfa a a thluk dan dah a nih theih nan CYMA-in hma la rawh se, Hlo tûr leh rannung thahna hlo kan hman dan hi fimkhur tak leh a nihna tur ang taka hman a nih theih nan a ṭûl anga hmalak ni se, Ruihhlo ngaite chhanchhuahna tur Rehabilitation Centre ṭha leh changtlung tak neih a nih theih nan Central YMA-in hma la rawh se, Mizoram chhunga Central leh State Institution hrang hrang awmah hian Mizo ten Seat tam zawk kan chan theih nan CYMA-in hma la rawh se, Mizoram hmun hrang hranga inkalpawhna kan neihte hi tun aia tha leh changtlung zawka siam a nih theih nan CYMA-in hma la rawh se, tih te a ni a.
Sawrkar khawih Agenda 3 an pawm tak te chu – Tun aia kan lo intodelh theih zawk nan thingtlang aṭanga thlai thar Aizawl khawchhunga zawrhna tur sawrkar-in ngaihtuah rawh se, Mizoram leh Bangladesh ramri khauh taka venhim a nih theih nan sawrkar ngen ni rawh se tih leh Dan lo anga din, Chakma Autonomous District Council (CADC) hi Dan anga ṭhiah a nih theih nan Central YMA-in hma la rawh se, tih te a ni.
Rorel palaite hian General Conference neih lehna hmun atan North Vanlaiphai khua an thlang a, 2018-2019 Budget atan Rs.114,87,900/- pawm a ni bawk.