Nimin khan CDAR Complex, Aizawl Tuirial Vengah Ministry of Oil and Natural Gas, Govt of India leh CSIR – CMERI, Government of India chuan Technology Dissemination Workshop an buatsaih a, an thupuiah “Tung rah aṭanga Bio Diesel siam” tih a ni.
He hunah hian Pu PL Thanga, Member Secretary, State Planning Board leh Vice Chairman, NLUP Implementing Board chu khuallian niin, Sawrkar Laipui aiawhin Scientist 7 he Workshop buatsaih tur hian an lo kal a, Tung chingtute mi 50 chuang zet an kal khawm bawk a ni.
Workshop ah hian Tung rah sawngbawl dan leh hlâwk zawka kalpui dan tur bakah Tung rah aṭanga Bio Diesel siam a, Tung chingtuten hlawkna tam zawk an hmuh theih dan tur sawiho a ni a, Tung chingtuten ten an hlawkpui hle a ni.
Khuallian Pu PL Thanga chuan thusawiin Tung rah sawrna khawl ṭha a awm loh avangin Tung chingtuten kum 2002 vel atang khan marketing problem an nei a, he harsatna sukiang tur hian NLUP hnuaiah Tung trade hlawhtling zawka kalpui turin NLUP Implementing Board (NIB) leh CDAR hotuten Chief Minister remtihna in CSRI-CMERI, Govt. of India scientist hote hnenah Tung khehna khawl siam turin an ngen a, tunah hian CSRI-CMERI scientist hote hian Tung khehna khawl mai nilovin Tung oil aṭanga Bio-Diesel siam dan tur thlengin an ruahman chhuak ta a. An khawl siam enchhinna turin Tung rah 50 kg pek an ni a, uluk taka enchhin a nih hnuin a ṭangkai hle dawnin a hriat a ni a ti a, hetianga hma lakna thar avang hian Tung chingtute te tan beiseina kawl a êng ṭan mai nilovin Tung rah aṭanga Bio Diesel leh thil ṭha tam tak siam chhuaha Mizoram mamawh siam chhuahna hmanrua ni turin hma lak tum a ni a ti bawk.
Tung rah khehna khawl pathum chu CSRI – CMERI hian a thlawnin NIB ah an pe dawn a. Tung chinna hmuna hman turin pekchhuah leh a ni ang. Hemi bakah hian scheme anga Tung chinna, sawngbawl (process) na leh Bio Diesel leh Tung rah aṭanga hamthatna chi hrang hrang hman ṭangkai dan tur CSRI – CMERI Scientist ten kum 6 dawn lai research beia an zirchian hnua an hlawhtlinna hi Mizoram tana hman ṭangkai a nih theih dan tur he workshop-ah hian sawiho a ni a, sawrkar laipui leh Mizoram sawrkar ṭangduna Scheme thar anga kalpui dan tur ruahmanna chu CSRI – CMERI hian NIB ah kar hnih chhungin rawn thawn nghal turin rel a ni.
Workshop-ah hian Tung rah ṭangkaina leh a chingtute hamṭhatna tur hrang hrangte bakah Tung rah aṭanga Bio Diesel leh thil ṭangkai dang chi hrang hrang siamchhuah dan te zirtirho a ni.