Zothlifim Logo
Loading ...

SERCHHIP: Serchhip District chhung, Tuikum Assembly Constituency-a Congress Party ticket-a ding tur Pu Sangzela Tlau chuan Sawhthing hi khawvelah a market a \ha thei tak tak lo a, sawhthing hi Mizoram damna a ni lo a ti.

He thu hi nimina Tuikum AC Block –I huamchhungah Congress Party ten “Inthlan Campaign Kick-Off cum Political Training” an neihnaah Pu Sangzela Tlau hian a sawi a, Pu Sangzela Tlau chuan Tuikum biala Candidate ni thei tura Pathian leh Party Nomination Committee duhsakna a chang chu lawmawm a tih thu sawiin, damlo kan, mahni bialte ruang phurhna tum leh tawngkam tha taka inchibai ringawt hi MLA tha nihna a nilo a, MLA tha chuan Vision a nei tur a ni a, a bial leh ram tan hmasawnna tur chhenfakawm tak din a nih theih nan rua-hmanna leh hmathlir tha neiin, tipuitling turin sum leh pai a haichhuak thei tur a ni a ti.

Pu Sangzela chuan hun rei tak Tourism âtchilha zirchiang-tu a nihna chu Mizoram leh Tuikum Bial tan chhenfakawm tak a nih tur thu sawiin, Tourism chu thalai lehkhathiam hna hmulo te tan damdawi a ni tiin, khawvel ram danga vûrin a khuh tlâng bâwk pakhatin sum tam tak a hailuh theih chuan Tuikum bial chhunga tawi tlang chuan a theih loh bikna tur a awm lo a ti bawk.

A sawi zelnaah Pu Sangzela chuan Tourism ringawt buai-pui a nih loh thu leh Agriculture lamah pawh thil tam tak a zir thu a sawi a, khawvel huap-in sawhthing chu a rate a tha tak tak lo tih a sawi a, Mizoram leh India ramah chhungkaw khat hian kum khat ah sawhthing kg 20 eiral an awm mang lova, ram hrang hrangah pawh chutiang tho chu a ni a ti a, Mizoram sawhthing aiin China sawhthing chu a tha zawk a hralh sumah pawh a thlanawm zawk tiin, sawhthing hi Mizoram damna a nilo a Campaign nana hmang thin ZPM te pawh hian a market leh budget-a dah a nih dan tur an sawi thleng ngai lo a ti bawk.

Pu Sangzela Tlau chuan Tuikum Bial \halai te tan Chhingchhip Mualpui field ah Grass phah mai piah lam ah infiamna hrang hrang tih theihna tur Tuikum Sports Complex siam tum niin NEC-ah thehluh mai tura peih a ni tawh thu a sawi bawk

He hun hi Pu F Lalrin-nunga, Joint Secretary Block –I Congress Committee chuan kaihhruaiin, he hun hmanpuitu Agriculture Minister Pu KS Thang pawhin thusawiin, Tuikum bialin Candidate tha tak an nei chu a lawmpui thu te,Congres party Nomination Committee-in ngun taka kan ngaihtuah hnuah Pu Sangzela Tlau hi an rawn dah tak thu a sawi a, tuna an MLA ni lai mek in a tihtheih tawk aia sang chu Pu Zela’a a tih theih dawn thu leh bial hrang hrang a fangkual naah bakah tawi bialah an party chuahsan zâmna khawp an awm loh thu te, Tuichang (Khawzawl)-ah pawh an boruak a tha-in an chak ngei a rin thu te leh NLUP chu Agriculture Minister hluiin NLUP tawp mai tur anga a a sawi chu dawt a ni thu te a sawi bawk.

He hun hmanpuitu dang Pu Ronald Sap Tlau MP (RS) pawhin MNF hotute chuan Corruption avangin Falkawn Referal Hospital, Tuirial HEP an tichhe vek a, Mizoram hmasawnna dâltu an an nih thute a sawi ve bawk.
Tuikum Block-I huam chhung khaw 10 ah Congress Unit 17 a awm mek a , Tuikum Block –I Congress Committee ten “Inthlan Campaign Kick-Off cum Political Training”an neih hma hian an party MLA Candidate Pu Sangzela Tlau leh a thawhpuite chu Chhiahtlang daiah lo hmuakin, Chhiahtlang khaw chhung fankual pui an ni a, Community Hall-ah hun hman zui a ni.