Zothlifim Logo
Loading ...

MJA Serchhip District chuan Ningani khan SIRD Auditorium, Serchhip-ah Annual Conference vawi 12-na hmangin he hun hi bialtu MLA, Lalduhoma chuan khuallian niin a hmanpui a, MJA General Hqrs. President, Zonun-sanga Khiangte pawhin khual-zahawm niin a hmanpui bawk.

MJA Annual Conference-ah hian khuallian chuan thusawiin, India sawrkar chuan Journalists te a ngai pawimawh hle tih sawiin, chanchinbu leh chanchinbu mite chu ‘The Fourt Estate’ tia sawi an nih thin thu a sawi a. Journslists te chu mipui thlavang hauhtu, sawrkar khalh ngila thahnem-ngai taka hna thawk thin an nih thu sawiin, chutihrual chuan thudik leh belhchian dawl chauh chhuah tur an nih thu a sawi a. Social Media-ah thu diklo leh mipui tiralkhel thei thu post a awm fo thin thu sawiin, chutiangah chuan mipui ten thudik a nih leh nih loh fiahna atan chanchinbu te an hman thin thu a sawi a. Mipuite hnena thu dik chauh hrilh thintu, mipui ten an rinngam Journslist nih chhunzawm leh a pawimawh takzet tih a sawi a. MJA Serchhip District ten Press Club an sak mek chu a puitlin nan theihtawp an chhuah tur thu a sawi bawk.

Khualzahawm Zonunsanga Khiangte pawhin thu-sawiin, Journalist te chu teirei peihna kawnga entawntlak an nih thu sawiin, mipuite kawng dik kawhhmuhtu an nih thu a sawi a. Tunlai khawvel chang-kang zelah Social Media a lâr tak thu leh heng te hi mi then-khatten thu diklo thehdarhna atan te an hman thin avangin Journalist te chuan an paper kaltlanga mipuite thudik hrilha kaihhruai chu an rawngbawl-na a nih thu a sawi a, Journalist ten Journalists pension an neih ve theihna tur hma an lakna hrang hrangte pawh a sawi bawk.

MJA Serchhip District Annual Conference hi an Vice President, Kapliana Pachuau chuan kaihruaiin Serchhip DIPR, K.Saitluanga, MIS pawhin he hun hi hmanpuiin MJA te leh I&PR te chu inhnaih taka thawk tlang an nih thu a sawi a. Sawrkar in Journalists te tana hma a lakna leh ruahmanna hrang hrang a siam te pawh sawilangin, MJA Serchhip District te tan hian tun sawrkar kum chhungin sawrkar in Tuirial HEP tlawhna hun siam a tum thu a sawi a. MJA Serchhip District President, C. Ramengmawia pawhin MJA Serchhip District Member ten lungrual taka hma an la leh sawrkar zara Press Club sak hna bul an tan thei ta te chu lawmawm a tih thu a sawi bawk.

MJA Serchhip District Annual Conference hi hun hnihah then niin hun hmasa lamah an President, C.Ram-engmawia kaihhruaiin rorelna hun hman a ni a, he hunah hian report hrang hrang ngaihthlak a ni bawk.

MJA Serchhip District hi kum 2000 khan ‘Serchhip District Journalists Association’ tia din niin kum 2007 khan District hrang hranga Journalists Association te thiata MJA-a an inchhunluh khan a inchhunglut hmasa ber an ni a, tunah hian Member 14 awm mekin heng zingah hian Thenzawl atangin mi 2 leh North Vanlaiphai atangin mi 1 an awm a ni.