Serchhipin India ram ai kan awh dawn a, engkimah fimkhur a ngai:Sports Minister

SERCHHIP: Sports & Youth Services, Tourism etc. minister Robert Romawia Royte chuan February ni 10-16, 2020-a Serchhip-a Paragliding Accuracy World Cup 2020 and Grand Festival neih tur chu India ram aiawhin Serchhipin kan thleng dawn a ni a, kawng engkimah fimkhur a ngai dawn tih a sawi.
Nimin khan Serchhip Leisekawt Playground-ah Robert Romawia Royte chuan Serchhipa thuthar theh-darhtute hmaah Paragliding Accuracy World Cup 2020 and Grand Festival chungchang leh December thlaa neih tur Mizoram State Games, 2019 chungchanga inbuatsaihna leh ruahmannate a hrilhfiah-naah he thu hi sawiin, Sports Minister chuan Paragliding Accuracy World Cup 2020 and Grand Festival-ah hian paraglider 150 vel lo tel tura an beisei thu a sawi a, infiammi bakah hian a chhim tur foreign a\ang mai bakah India ram hmun dang a\ang pawhin mi engemawzat lo kal tura beisei an nih thu a sawi a, hetianga infiammi lo kal tamna world level tournament hi Mizoram hmun dangah pawh an thlen leh mai mai a rinawm loh tih a sawi a, khawpui pakhatin a ruala hetiang zat foreigner leh tourists engemawzat a thlen dawn avang hian kawng engkimah fimkhur a ngai a, a khaw mipuite an hmuhdan chu India ram an hmuhdan leh Mizoram an hriat zuina tur a ni dawn tih sawiin, venhimna chungchangah pawh fimkhur a \ul takzet tih a sawi a, he intihsiakna hi khawvel hmun dangte en theih turin live-a TV-a tihchhuah tum a nih thu a sawi bawk.
Robert Romawia Royte chuan Paragliding Accuracy World Cup and Grand Festival atan hian sum awm thei ang angte zawn mek zel a ni tih a sawi a, mikhual thlenna turte pawh buaipui mek niin, Tourist Lodge-te pawh thuam\ha turin ruahman a ni tih a sawi a, Serchhip-a hotel awmte pawh foreigner thlenna tlak a ni em tihte pawh enfiah a ni ang tih sawiin, Thenzawl thlengin mikhual thlenna tur hian buatsaih a ni dawn a, Serchhip khawchhungah pawh mimalin mikhual an thlenna tur (Home Stay)-te pawh buatsaih ni thei se \ha a tih thu a sawi bawk.
Sports Minister chuan thuthar lakhawmtute zawhna chhangin Chuanhnuaia Paragliding tihna hmun chu sawrkar a\angin a nghet (permanent)-a siam tumna a awm tih a sawi a, a \umna (landing) atana Zawlpuia ram lei chungchanga zawhna chu hemi chungchangah hian sawrkar a\angin indawrna mumal a la awm loh thu a sawi bawk.
Tourism Minister ni bawk Robert Romawia chuan Paragliding Accuracy World Cup and Grand Festival-a tel paraglider engemawzat chu nakuma Serchhipin K|P General Conference a dawn tur denchhenin intihsiakna zawh hnuah pawh châm chhunzawm tum an awm tih a sawi bawk.
Minister chuan kum 34 hnua Mizoram State Games, December 9–13, 2019-a neih turah infiamna (event) 221 (mipa event 132, hmeichhe event 88 leh mixed event 1) a awm tur thu sawiin, gold medal 403, Silver 406 leh Bronze medal 565 sem chhuah tur a awm dawn tih a sawi a, hemi atan hian cheng nuai 150 dah a nih thu leh a \ul anga la dah belh theih a nih thu a sawi a. Hemi atan hian Serchhip constituency pawh lawmman tam tak la thei tura \ha taka inbuat-saihna kalpui turin a sawm a. Mizoram State Games chu Olympic-a infiamna (discipline) awm angahte Mizoramin hma a sawn zel theihna atana buatsaih a nih thu a sawi a ni.
Minister-in Press Meet a neih hi Adviser to Chief Minister C. Lalramzauva leh H.Biakzauva, MLA te, PC Laltlanthanga, Secretary, Mizoram State Sports Council leh K. Saitluanga, DIPRO-ten an \awiawm a ni.