Assam-a NRC kalpui hnuah Temporary ILP pek tlahniam

Assam-a National Registration of Citizen (NRC) in India kalpui a nih hnuah Kolasib District chhunga ILP Counter hrang hrang aṭanga Temporary ILP pek chhuah chu nasa takin a tlahniam.

Inrinni khan MJA, Kolasib District member-te chuan Kolasib District-a ILP Counter awmna, Vairengte, Phaisen leh Bairabi te tlawhin Temporary ILP an pekchhuah dan an zawtfiah a, temporary ILP an pekchhuah report aṭanga a lan danin Assam-a NRC an kalpui hnuah counter hrang hranga Temporary ILP pekchhuah hi nasa takin a tlahniam a ni.

Vairengte-ah hian August thla khan Temporary ILP hi 9128 an pechhuak a. September ah 7842 an pechhuak a, October ah 6850 an pechuak leh bawk a. Assam a NRC an kalpui hnuah Temporary ILP pekchhuah hi a tlem zel a ni.

Bairabi ah pawh Assam a NRC kalpui a nih hnuah Tempo-rary ILP an pekchhuah hi a tla-hniam nasa tih thawktute chuan an sawi a. NRC kalpui a nih hma kha chuan thlatin Temporary ILP hi 2500 aṭanga 3000 vel an pek chhuah ṭhin laiin thla hmasa khan 1500 chauh an pechhuak a ni.

ILP pekchhuahna counter hrang hrang ah hian thawktu indaih lo chu an harsatna lian ber a ni a. ILP counter te hi darkar 24 chhung hawn a nih laiin Vairengte ah hian thawktu 3 chauh an awm a. Bairabi ah hian mi 2 chauh an awm bawk a. Phaisen hi chu IR duty ten an pekchhuah avangin duty a piang kutah a awm thung a ni.

Bairabi ah hian ILP counter hi Assam lam atanga Railway station thlen hma in a awm a. Railway Station ah hian ILP Counter hi awm tur a nih laiin tunlai hian an kalpui lo niin thawktute chuan an sawi a. Rel atanga hnamdang lo kalte chuan ILP siamtir tur hian coun-ter hi an pan mai ṭhin niin an sawi a, ILP counter a thawktute chuan Tourist chu an harsatna a nih thu an sawi a. ILP ngai ah hian tourist hi ziahtel a nih loh avangin tourist tan a ngai lo ti an awm ṭhin thu an sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram