Zothlifim Logo
Loading ...

Nimina Assembly Session-ah Social Welfare & Tribal Affairs Minister Dr. K. Beichhua put luh Official Resolution pawm a ni.

Dr. K. Beichhua Official resolution put luh hi Mizoram Legislative Assembly-in kum 2009 October ni 29-a Official resolution a lo pawmpui hnua dân anga hman mek, The Scheduled Tribes and Other Traditional Forest Dwellers (Recognition of Forest Right Act) 2006 paihna tur a ni a.

A pu luttu Dr. K. Beichhua hian resolution a putluh chhan sawiin, ram Danpui, Constitution Article 371 G-ah Mizoram chu thuneihna sâng tak pek a ni a, Mizote sakhaw biak dan leh vantlang nunte, pipute aṭanga dân an lo neih leh chumi hmanga thubuai hla buai remnate, ram neih leh hralh thu-ahte chuan Mizoram State legislative Assembly-in a pawmpui ve a nih loh chuan ram Danpuia inziak Dante chuan Mizoram a huam ve lo ang tih a ni, a ti a.

Hetia ni chung hian Parliament chuan Jammu & Kashmir tih loh ram chhunga state zawng zawng hman atan “The Scheduled Tribes and Other Traditional Forest Dwellers (Recognition of Forest Right Act) 2006” chu a lo pass ta a; he Dan hian Constitution Article 371G clause (a) a khawih avangin Mizoram Legislative Assembly-in a pawmpui ve phawt a ngai a. Chutiang tur chuan Mizoram Legislative Assembly chuan kum 2009 October ni 29 khan official resolution pawmin he mi kum vek Decmber thla ni 31 atangin Dan-a hman a lo ni ta a ni, tih Dr. K. Beichhua chuan a sawi a ni.

He Dan hi kum 10 chhung Mizoramah hman a ni tawh chungin hmang ṭangkaitu tumah an awm lo tih sawiin, Ministry of Tribal Affairs-in a din Project Appraisal Committee pawhin kum 2015 khan Mizoram chungchang chu rel fel a ni tawh, a ti a, Forest Right Act kalpui nana dil Cheng Nuai 10 pawh a rawn pe duh tawh lova, hei hian he Dan hi Mizoram tan awmze nei lo a ni tih a lantir a ni, tiin Dr. K. Beichhua chuan a resolution putluh chhan a sawifiah.

Official Resolution hi member-te’n sawihoin sawi-honaah hian Chief Minister Zoramthanga leh Dy. Chief Minister Tawnluia te pawh an tel a, Eptu Member Lal-duhoma leh Dr. BD Chakma-te chuan Official resolution hi pawm an duh loh thu an sawi a. Speaker kaihhruaia resolution hi pawm a nih dawn leh dawn loh bûknaah pawm duhtu an tam zawk avangin Dr. K. Beichhua-a Official Resolution put luh hi House chuan a pawm ta a ni.