Assembly Session neih tan a ni

Ni 3 chhung awh tur Eight Mizoram Legislative Assembly ṭhutkhawm vawi 4-na, Speaker Lalrinliana Sailo hova neih ṭanah, Chief Minister Zoramthanga chuan Mizoram hmun hrang hranga kawng chei ṭhatte chu MNF sawrkar hnuah hnathawhna hun a la tlêm avangin thawh hman a la nih loh thu leh hmanrua indaih loh vang leh MP inthlan awm vangte, fur ruahtui tlak chhunzawm avangtein hna thawhna hun a la awm tlêm tih a sawi.

Thutkhawmah hian Subject Committee hmalakna paper pahnih house-ah pharh a ni a, report pathum leh official resolution pakhat put luh a nih bakah, Health Minister Dr. R.Lalthangliana Bill put luh ‘The Mizoram Anatomy (Amendment) Bill, 2019 chu sawiho hnuah pawm a ni. Heng bakah hian House chuan Ex-MLA Thankima sûnna hun a hmang bawk.

Zawhna leh chhânna hunah PWD changtu Chief Minister Zoramthanga chuan Thenzawl to Zote Road Black topping hna chu Nayak Infrastructure Private Limited, Guwahati ten an thawk a, he hnathawhna tur hian cheng nuai 1,204.25 estimate a nih thu House a hrilh a. Session hmasa lama assurance pek tawh Then-zawl Tualvungi Veng kawng Km. 1 vela thui short-cut chu cheng nuai 145 vel senga siam theih beisei a nih thu leh sum hmuhna tur a la chian loh avang-in thawh a la ni lo, tih a sawi a. Champhai leh Tuipui inkar kawng tha lo pawh a enkawltu BRTF ni mahse, a theih ang anga thuam tum a nih thu leh Biate leh Tuipui inkar kawng pawh zauh tura sum tam tak sen a ngaih dawn avangin duh anga chet a har hle a ni, a ti bawk.

Ṭhutkhawmah hian Home Minister Lalchamliana chuan Mizoram sawrkarin official-a Mizoram ramri a pawm chin chu- Mizoram-Assam ramri Bengal Eastern Frontier Regulation 1873 hmanga Inner Line Notification August ni 20, 1875 a tihchhuah leh Mizoram-Tripura, Manipur, Myanmar leh Bangladesh – Bengal Eastern Frontier Regulation 1873 hmanga siam Inner Line Notification March ni 9, 1933 te chu pawm a ni tih a sawi.

Congress member Zodintluanga zawhna leh member dangte zawhbelhna chhangin Home Minister chuan ramri chungchanga hma la turin sawrkar chuan tan chhan tha tak nei turin hma a la reng a ni tih sawiin, sawrkar hmasa hun laia Core Committee chu sawrkar tharah reconstitute in vawi engemaw zat ṭhutkhawm tawh a ni a, Mizoram sawrkarin ṭan chhan tur document pawimawh a khawn khawm zel a ni, a ti a. Zophai vela Indo-Tibetan Border Police(ITBP) leh Border Security Force (BSF) duty tir chungchang chanchinbua tihchhuah chu police hotuten an chhui chiang nghal a, Mizoram ep tura dah ni lovin, Assam sawrkarin NRC a kalpui dawn avanga law & order kengkawh turin Hailakandi District-ah duty-tir an nih thu leh Mizoram ramriah an duty lo tih a sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram