Bru hruaikir hna thawh 9-na kal mek Mizoramah kir awmlo

Tripura Bru Camp hrang hranga Mizoram khua leh tui hruai kir thawh 9-na kal mekah nimin khan Mizorama kir an awm lo.

Bru-te hruai kir tura Mizoram sawrkar tirhte chu nimin khan Tripura-a Bru camp lian ber Naisingpara-ah Mizorama haw duhte hruai kir turin an kal leh a, amaherawhchu Mizorama kir duh an awm lo a ni.

Mizoram sawrkarin Tripura Bru camp-a awm te hruai kir tura a tirh Liaison Officer (LO) te chu Bru camp hrang hrangah nitin kal ṭhin mahse Bru NGO ten Central Sorkar kar nana thla hlui ni 31a kawng an dan hnu aṭang khan Mizorama kir duh Bru an awm tawh lova, mahni thua Kanhmun Facilitation Centre Liaison Officer hnena in- report pawh an awm mumal tawh lova, lo kir duh awm lo mahse sawrkar thuchhuak angin anmahni hruai kir tura Mizoram sawrkar tirh LO te chu nitin Bru camp-ahte hian an kal ziah a ni.

Hetihlai hian tun thla ni 8a Mizoram sawrkar, Council of Minister ṭhukhawm chuan Bru hruaikir hna hi ruahman lawk angin tun thla ni 30 thleng kalpui nise, a hnu lamah chuan hruai kir hna hi thawh tawh loh ni se, tiin thutlukna a lo siam tawh a ni. Bru hruai kir thawh 9naah hian district 3 – Mamit, Kolasib leh Lunglei district-a awm tur Bru chhungkaw 4,447 hruai kir tura ruahman ni mahse chhungkaw 221 chiah hruai kir an la ni.

Leave a Reply

This site uses Akismet to reduce spam. Learn how your comment data is processed.