Nimin khan Lawngtlai District-a HIV leh syphilis (saihri) dona beihpuithlak tur chu Lawngtlai CMO Conference Hall-ah District Bawrhsap Shasanka Ala, IAS chuan hawngin, HIV test-na hmanrua vawn ṭhatna tur mini fridge chu sub-centre pathum hnenah a hlan nghal.
Shashanka Ala-i chuan HIV leh syphilis do beihpui thlak chu a hlawhtlin ngei theih nan thawktu zawng zawngte chu ṭhahnem ngai taka thawk turin a chah a. A bik takin, health worker-te leh ASHA te chu a hmuna thawktu an nih avangin mawh an phur thuk hle tih hre turin a chah a. HIV leh syphilis do turin hmanraw awm thei zawng zawng hman vek a ṭul thu sawiin, damdawi hmansual leh natna darh zel tur ven kawngah theihtawp chhuahin, mipui a tam thei ang berin thisen an test theih nan leh HIV hrik pai saa nau piang an awm lohna tura hma lak te chu ngaih pawimawh zual ni se a duh thu a sawi.
Mizoram State AIDS Control Society, Lawngtlai District Health Department leh World Vision India te ṭangkawp chuan Lawngtlai District-a khaw 35-ah HIV & Syphilis campaign hi an kalpui dawn a. He campaign-ah hian mipuite HIV laka an him theihna tura he natna chungchang zirtir bakah, HIV test-te, a vei an lo awm chuan enkawlna an dawn ngei theihna tura hma lak te a tel a . Lawngtlai District huam chhunga nu nau pai zawng zawngte HIV leh Syphilis test laktir a, a vei an lo awm a nih chuan an fate an kai chhawn lohna tura enkawl leh hma lak te a huam tel bawk.